म. टा. प्रतिनिधी, नगर
महापालिकेचे अंतिम मतदारयादी तयार करताना प्रभाग क्रमांक पंधराच्या यादीमध्ये प्रभाग क्रमांक तेरामधील जवळपास ५५० मतदारांची नावे सामाविष्ट केली आहेत. विशिष्ट उमेदवारालाच लाभ मिळेल, यासाठी भ्रष्ट व बेकायदा पद्धतीने 'बीएलओ'ला हाताशी धरून हे काम करण्यात आले आहे. तरी संबंधित 'बीएलओ'वर कारवाई करण्यात यावी, तसेच तक्रारीची दखल घेऊन तातडीने दुरुस्ती करण्यात यावी, अशी मागणी माजी उपमहापौर गितांजली काळे यांनी केली आहे; अन्यथा न्यायालयात जाण्याचा इशाराही त्यांनी दिला आहे. शिवसेनेच्या इच्छुक उमेदवारांनी हे कृत्य केले असल्याचा आरोपही करण्यात आला आहे.
महापालिकेची अंतिम मतदारयादी प्रसिद्ध करण्यात आली आहे. प्रभाग पंधराच्या यादीमध्ये 'बीएलओ'ला हाताशी धरून टिळक रोड, गाडेकर चाळ, शिल्पा अपार्टमेंट, महालक्ष्मी अपार्टमेंट बुरुडगाव, पटेल वाडी टिळक रोड, कानडे चाळ, जाधव मळा, युनियन ऑफिस टिळक रोड, केतकर हॉस्पिटल परिसर, अशा प्रभाग तेरामधील विविध भागांतील जवळपास ५५० नावे सामाविष्ट करण्यात आली आहेत. मुळात ही सर्व नावे प्रभाग पंधराच्या प्रारूप मतदारयादीमध्ये नव्हती. नव्याने सामाविष्ट करण्यात आलेले मतदार हे भौगोलिक दृष्ट्या आणि अंतिम प्रभाग रचनेनुसारदेखील सध्या वास्तवतेमध्ये प्रभाग पंधरामध्ये येत नाहीत. काही मतदार तर नेप्ती, केडगाव अशा ठिकाणी प्रत्यक्षात राहत असून त्यांच्या प्रभाग पंधराशी कोणताही संबंध येत नाही. तरी प्रभाग पंधराच्या यादीची फेरतपासणी करून, सर्वेक्षण करून सर्व चुकीची नावे वगळण्यात यावी किंवा या सर्व मतदारांचे मतदान अवैध धरण्यात यावे व संबंधित 'बीएलओ'वर कारवाई करण्यात यावी, अशी मागणीही करण्यात आली आहे.
यासंदर्भात निवेदन देण्यात आले असून न्यायालयात जाण्याचा इशाराही देण्यात आला आहे. सुनील काळे, गणेश अवसरकर, सुहास मुळे, नितीन भुतारे, प्रितेश गुगळे, चंद्रकांत पाटोळे, सुरेश गायकवाड, अनिकेत आगरकर आदी या वेळी उपस्थित होते.
......