दौंड-परळी रेल्वेसाठी पाठपुरावा करावा

म. टा. प्रतिनिधी, नगर
दौंड- सिद्धटेक-कर्जत-चौंडी-जामखेड-पाटोदा-केज-अंबाजोगाई-घाटनांदूर परळी या रेल्वे मार्गासाठी पाठपुरावा करावा या मागणीचे निवेदन खासदार दिलीप गांधी यांना देण्यात आले.
कर्जत- जामखेड तालुक्यातील पत्रकार आणि प्रेस क्लब यांनी यासाठी पुढाकार घेतला आहे. हा प्रश्न रेल्वेमंत्री सुरेश प्रभू यांच्यासमोर मांडण्याचे आश्वासन खासदार गांधी यांनी दिले. प्रेस क्लबचे अध्यक्ष मन्सुर शेख यांच्यासह पत्रकार संघटनांच्या पदाधिकाऱ्यांनीही हे निवेदन दिले. निवेदनात म्हटले आहे की, कर्जत, जामखेड, पाटोदा, केज, अंबाजोगाई हा परिसर दुष्काळी आहे. या ग्रामीण भागाच्या विकासासाठी रेल्वेमार्ग गरजेचा आहे. स्वर्गीय गोपीनाथ मुंडे यांना यासंदर्भात निवेदन देण्यात आले होते. दौंड- सिद्धेटेक -चौंडी जामखेड मार्गे परळी हा रेल्वेमार्ग रोजगाराच्या संधी उपलब्ध करून देणारा आहे. धार्मिक व पर्यटन क्षेत्रांना जोडणाऱ्या या रेल्वेमार्गामुळे पुण्यश्लोक अहिल्यादेवी होळकर यांचे जन्मगाव चौंडी जोडले जाईल. केद्र सरकारच्या भारत बटालियन केंद्रास जामखेड तालुक्यात मान्यता मिळाली आहे, त्यासाठीही हा मार्ग उपयुक्त ठरणार आहे. यावेळी जेष्ठ पत्रकार महेश देशपांडे महाराज, मिठ्ठूलाल नवलाखा संतराम सूळ यासीन शेख तुकाराम उंदुरे उपस्थित होते.