ग्रामसेवकांच्या प्रश्नांचा
पाठपुरावा करणार
नगर : राज्यातील ग्रामसेवकांचे अनेक प्रश्न अद्याप प्रलंबित आहेत. ग्रामसेवकांचे प्रश्न सोडवण्यासाठी प्रशासकीय पातळीवर पाठपुरावा करण्याचा निर्णय घेण्यात आला. ग्रामसेवक युनियनचे राज्याध्यक्ष एकनाथ ढाकणे यांच्या अध्यक्षतेखाली संघटेनची त्रैमासिक सभा नुकतीच झाली. या वेळी अशोक नरसाळे, पतसंस्थेचे चेअरमन विलास काकडे, एकनाथ आंधळे, बाळासाहेब कडू, सुनील नागरे, डॉ. ज्ञानदेव गांगर्डे, युवराज ढेरे, मंगेश पुंड, सुरेश मुंडलिक आदी उपस्थित होते.
पतसंस्थेने उतरवलेल्या विम्याअंतर्गत मयत सभासदाच्या वारसास ८ लाख रुपये रकमेचा धनादेश देण्यात आला. कंत्राटी सेवा कालावधी सेवाकाळ म्हणून ग्राह्य धरण्याच्या निर्णयासाठी यशस्वी पाठपुरावा केल्याबद्दल राज्य संघटनेच्या अभिनंदनाचा ठराव घेण्यात आला. सभासदांच्या पाल्यांना कमी किंमतीत स्पर्धा परीक्षेची पुस्तके उपलब्ध करून देण्याचा निर्णय घेण्यात आला. प्रादेशिक नळपाणी पुरवठा योजनेच्या सचिवांबाबत धोरणात्मक निर्णय घेण्याबाबत शासन स्तरावर पाठपुरावा करणे, पात्र सभासदांची सहावा वेतन आयोग निश्चिती व पडताळणी होण्याबाबत पाठपुरावा करणे, सभासदांचे सेवापुस्तक अद्ययावत करणे, सभासदाला मासिक वेतन स्लिप मिळणे, विविध सरकारी योजनांमधून मंजूर झालेल्या प्रकरणांच्या मंजुरीच्या आदेशाची एक प्रत ग्रामपंचायतीला मिळणे, ग्रामपंचायतीमध्ये काम करत असताना केलेल्या उल्लेखनीय कामाच्या नोंदी सेवा पुस्तकात घेणे, कामे पूर्ण झाल्यानंतर कामाचे मूल्यांकन तातडीने होऊन काम पूर्णत्वाचे दाखले तातडीने मिळणे, ग्रामसेवकांच्या अडचणी सोडवण्यासाठी दर तीन महिन्याला तालुका संघटना पदाधिकाऱ्यांसोबत सभा आयोजित करणे आदी विषयांवर चर्चा होऊन याबाबत पाठपुरावा करण्याचा निर्णय घेण्यात आला. जिल्हा सरचिटणीस अशोक नरसाळे यांनी आभार मानले.
.............