माजी नगरसेवकाला पंधरा लाखाला लुटले

म.टा.प्रतिनिधी,नगर

नवी मुंबई महापालिकेच्या शिवसेनेचे माजी नगरसेवक सतिश रघुनाथ रामाणे यांना नगर तालुक्यातील बुरुडगाव शिवारात स्वस्तात सोने देण्याच्या अमिषाने तब्बल पंधरा लाख रुपयांना लुटले आहे. याप्रकरणी गुरुवारी दरोड्याचा गुन्हा नगर तालुका पोलिस स्टेशनला दाखल झाला असून, दोघा जणांना पोलिसांनी ताब्यात घेतले असून, त्यांच्याकडे चौकशी सुरू होती.

या नगरसेवकाकडे दोन हजार रुपयांच्या चारशे नोटा, पाचशे रुपयांच्या बाराशे नोटा आणि शंभर रुपयांच्या एक हजार रुपयांचा नोटा होत्या. माजी नगरसेवक रामाणे यांच्या मोबाइलवर शांताराम पेंटर नावाचा व्यक्तीचा आठ ऑगस्टला फोन केला होता. ‘तुमच्या वॉर्डात कलर पेटिंगचे काम केले असून, माझ्या मामाला नगर येथे शाडू मातीच्या घराचे खोदकाम करत असताना सोन्याने भरलेली कळशी सापडली असून, हे सोने विकायचे आहे, नगरला येऊन सोने पाहून घेऊन जा’ असे आरोपीने सांगितले. सतिश रामाणे हे नगरमध्ये येऊन सोने पाहून गेले होते. पुन्हा ११ ऑगस्टला सोने खरेदी करण्यासाठी रामाणे व त्यांचे दोन मित्र नगरला झायलो गाडीतून आले होते. त्यांना बुरुडगाव येथे शेतामध्ये सोने देण्यासाठी नेण्यात आले. तेथे इतर आठ ते दहा आरोपी थांबलेले होते. रामाणे यांच्या हातातील पैशाची बॅग हिसकावून घेऊन ते पळून गेले. त्यानंतर रामाणे हे नवी मुंबईला निघून गेल्यानंतर गुरुवारी नगर तालुका पोलिस स्टेशनला येऊन गुन्हा दाखल केला आहे. यातील दोन आरोपींना पोलिसांनी चौकशीसाठी ताब्यात घेतले आहे.