प्रवरा मेडिकल कॉलेज कॅम्पस मधील घटना
म. टा. वृत्तसेवा, शिर्डी
प्रवरा मेडिकल कॉलेजत्या कॅम्पसमध्ये घुसलेल्या बिबट्याने केलेल्या हल्ल्यात चार जण जखमी झाले. मंगळवारी (१२ मार्च) सायंकाळी ही घटना घडली. सुरक्षा ड्युटीवर असलेले चार कर्मचारी या हल्ल्यात जखमी झाले आहेत. वनखात्याची टीम घटनास्थळी दाखल झाली असून ड्रेनेजमध्ये लपून बसलेल्या बिबट्याला पकडण्यासाठी पिंजरा लावण्यात आला आहे. या घटनेत नानासाहेब भोसले, बाबासाहेब कदम, अक्षय दशवंत, दीपक दिवे या चार कर्मचाऱ्यांच्या हाताला, पोटाला बिबट्याने चावा घेतला आहे. त्यांच्यावर उपचार सुरू आहेत. मेडिकल कॉलेज व हॉस्पिटलच्या परिसरात घनदाट झाडी असून या झाडीत हा बिबट्या लपून बसला होता. या घटनेने कॉलेज परिसरात विद्यार्थ्यांमध्ये घबराट पसरली आहे. रात्री उशीरापर्यंत बिबट्याला पकडण्याचे प्रयत्न सुरू होते.