नगर : जिल्हा उद्योग केंद्रामार्फत कर्जप्रकरण मंजूर करण्यासाठी १ लाख ८० हजार रुपये घेऊन नगरमधील तरुणाची फसवणूक करण्यात आली. याप्रकरणी दोघांविरुद्ध तोफखाना पोलिस स्टेशनला फसवणुकीचा गुन्हा नोंदविण्यात आला आहे.
नगर शहरातील भिस्तबाग येथील अनिकेत रवींद्र राठोड याची फसवणूक झाली आहे. राठोड याच्या फिर्य़ादीवरून सूरज शशिकांत मेहेत्रे, पूजा सूरज मेहेत्रे (रा. पुणे) यांच्याविरुद्ध फसवणुकीचा गुन्हा नोंदविण्यात आला आहे. नवीन व्यवसाय सुरू करण्यासाठी अनिकेत राठोड याला जिल्हा उद्योग केंद्रामार्फत कर्ज हवे होते. हे कर्जप्रकरण मंजूर करण्यासाठी अनिकेत मेहेत्रे, पूजा मेहेत्रे यांनी १ लाख ८० हजार रुपयांची मागणी केली होती. राठोड याने बँक खात्यातून मेहेत्रे यांच्या बँक खात्यावर तीन वेळेस मिळून १ लाख ८० हजार रुपये गेल्या वर्षी जुलै व ऑगस्ट महिन्यात वर्ग केले होते. परंतु, त्यानंतर कर्जप्रकरण मंजूर झाले नाही. याबाबत मेहेत्रे पती-पत्नीने राठोड याला उडवाउडवीची उत्तरे दिली. घेतलेले पैसे परत करण्यास नकार देऊन शिवीगाळ करून जीवे मारण्याची धमकी दिली. याप्रकरणी पोलिस गुन्हा नोंदऊन घेत नसल्याने राठोड याने न्यायालयात खासगी फिर्याद नोंदविली होती. न्यायालयाने गुन्हा दाखल करण्याचे आदेश पोलिसांना दिले होते. त्यानुसार बुधवारी रात्री मेहेत्रे पती-पत्नीवर फसवणुकीचा गुन्हा नोंदविण्यात आला.