महिनाभर मोफत आरोग्य तपासणी

म. टा. प्रतिनिधी, नगर
जैनमुनी आचार्यश्री आनंदऋषिजी महाराजांच्या स्मृतिनिमित्त येथील आनंदऋषिजी हॉस्पिटल अँड रिचर्स सेंटरमध्ये सुमारे महिनाभर मोफत आरोग्य तपासणी शिबिरे आयोजित करण्यात आली आहेत. येत्या १ मार्च ते २७ मार्च दरम्यानच्या रोज सकाळी १० ते दुपारी २ या वेळेत होणाऱ्या या शिबिरांमध्ये विविध आजारांची तज्ज्ञ डॉक्टरांद्वारे मोफत तपासणी केली जाणार आहे तसेच आवश्यकता असणाऱ्या रुग्णांवर सवलतीत उपचार केले जाणार आहेत.
आनंदऋषीजी महाराजांचा स्मृतिदिन दरवर्षी २८ मार्चला असतो. त्या निमित्त मोफत आरोग्य शिबिरे दरवर्षी होतात. यंदा या शिबिर उपक्रमाची सुरुवात १ मार्चला हार्निया, हायड्रोसिल व अन्य जनरल शस्त्रक्रिया शिबिराने होणार आहे. यात डॉ. प्रवीण मुनोत, डॉ. विवेक भापकर व डॉ. सतीश राजूरकर हे रुग्णांची मोफत तपासणी करणार आहे. याशिवाय याच दिवशी डॉ. श्रुतिका व डॉ. वर्धमान कांकरिया तसेच डॉ. संदीप राणे यांचे मोफत मोतिबिंदू शस्त्रक्रिया शिबिर होणार आहे. याशिवाय दुर्बिणीद्वारे बिनटाका शस्त्रक्रिया शिबिरात पित्ताशय, हार्निया, वंध्यत्व तपासणी, गर्भाशय पिशवी काढणे, कुटुंबनियोजन तपासणी व उपचार होणार आहेत. ही तिन्ही शिबिरे ३१ मेपर्यंत सुरू राहणार आहेत.
७ मार्चला स्त्री रोग व गर्भवती महिला आरोग्य तपासणी शिबिर, ८ मार्चला होमिओपॅथीद्वारे हार्मोन्स व त्वचा विकार तपासणी व उपचार, ९ मार्चला मधुमेह व उच्च रक्तदाब तपासणी, ११ मार्चला कर्करोग तपासणी, १४ रोजी बालरोग तपासणी, १६ रोजी कान-नाक-घसा तपासणी, १९ रोजी हृदयरोग तपासणी, २१ रोजी मेंदू, मणके व मज्जारज्जू आजार तपासणी, २४ रोजी किडनी विकार तपासणी, २५ रोजी अस्थिरोग व मणके-सांधेबदल तपासणी होणार आहे. २७ मार्चला या मोफत आरोग्य तपासणी शिबिरांचा समारोप दंतरोग तपासणी व चिकित्सेने होणार आहे. यात सहभागी होऊ इच्छिणारांनी ०२४१-२३२०४७३ ते ७६ यावर संपर्क साधावा.