पोलिसांची कुणकुण लागताच जालन्यात सोडले
म. टा. प्रतिनिधी, नगर
नगर शहरातील हुंडेकरी उद्योग समुहाचे संचालक करीम हुंडेकरी यांचे चौघांनी सोमवारी पहाटे अपहरण केले. त्यानंतर पोलिसांनी तातडीने तपास पथके रवाना केली. या पथकांची अपहरणकर्त्यांना कुणकुण लागल्याने त्यांनी हुंडेकरी यांना जालना शहराजवळ सोडून दिले. त्यानंतर हुंडेकरी बसमधून नगरला सुखरूप दाखल झाले आहेत. यातील आरोपींचाही पोलिसांना तपास लागला असून, त्यांना अटक करण्यासाठी पथके रवाना झाली आहेत.
करीम अब्दुल सय्यद ऊर्फ हुंडेकरी (वय ६५) हे सर्जेपुरातील एसटी कॉलनीसमोरील फकीर गल्लीत राहतात. सोमवारी पहाटे साडेपाच वाजण्याच्या सुमारास मशिदीत नमाज पठण करून ते घरी येत असताना चार जणांनी त्यांचे कारमधून अपहरण केले. ही घटना काही जणांनी पाहिल्यानंतर त्यांनी याची माहिती हुंडेकरी यांच्या मुलाला दिली. त्यानंतर पोलिस पथकांनी हुंडेकरी यांचा शोध सुरू केला. सर्जेपुरा, कोठला भागातील सीसीटीव्ही कॅमेऱ्यांचे फुटेज तपासल्यानंतर एका कॅमेऱ्यामध्ये भरधाव वेगाने कार जात असल्याचे दिसून आले. तांत्रिक तपासामध्ये हुंडेकरी यांना घेऊन अपहरणकर्ते जालना, औरंगाबादकडे घेऊन गेल्याचे उघड झाले. औरंगाबाद, बीड, जालना, नगर या चार जिल्ह्यांमध्ये हुंडेकरी यांचा शोध सुरू होता. बाहेरच्या जिल्ह्यामध्ये पोलिसांकडून महामार्गांवर नाकाबंदी करण्यात आली होती. हुंडेकरी यांचा पोलिस शोध घेत असल्याची कुणकुण अपहरणकर्त्यांना लागताच त्यांनी हुंडेकरी यांना जालना येथे सोडून दिले. जालनाहून पुणे येथे जाणाऱ्या एसटी बसमधून हुंडेकरी नगरकडे येत होते. ही बस जेऊर टोलनाक्यावर तपासल्यानंतर हुंडेकरी त्यात आढळून आले. त्यानंतर पोलिस अधीक्षक कार्यालयात आणून त्यांच्याकडे अपहरणकर्त्यांबाबत विचारपूस करण्यात आली. अपहरणकर्त्यामधील एक जण नगरमधील सराईत गुन्हेगार असून, त्याच्याविरुद्ध खंडणीची गुन्हे दाखल आहेत. याच कारणासाठी त्यांचे अपहरण झाल्याचा पोलिसांना संशय आहे. परंतु हुंडेकरी यांच्या नातेवाइकांना फोन करून अपहरणकर्त्यांनी खंडणी मागितलेली नाही, असे पोलिस अधिकारी सांगत आहेत.
...अन् सुटकेचा निःश्वास
हुंडेकरी यांचे अपहरण झाल्याने हुंडेकरी कुटुंबीय घाबरून गेले होते. तपासामध्ये अपहरण करणाऱ्यांमध्ये एक सराईत गुन्हेगार असल्याचे उघडकीस आल्यानंतर पोलिस अधिकाऱ्यांच्या मनात अनेक शंका आल्या. नाशिक, मुंबई येथून वरिष्ठ अधिकाऱ्यांनी याबाबत माहिती घेऊन तपासाच्या दृष्टीने सूचना केली. चार जिल्ह्यातील पोलिस हुंडेकरी यांचा शोध घेत होते. दुपारच्या वेळी उद्योजक हुंडेकरी हे एका बसमध्ये सुखरुप आढळून आल्याने पोलिस, नातेवाइकांनी सुटकेचा निःश्वास सोडला.