म. टा. प्रतिनिधी, नगर अखंड १६८ तास चालणारे भजन...१५ मिनिटांत लाखो भाविकांना एकाचवेळी महाप्रसाद वितरण...या महाप्रसादासाठी गावागावांतून एकाचवेळी येणाऱ्या विनामूल्य लाखो भाकरी...एकाच वेळी तयार होणारी तब्बल चार हजार लिटर आमटी... २४ तास अखंड चालणारे आमटी-भाकरी प्रसाद वितरण...अशा अनेकविध वैशिष्ट्यांचा सद्गुरू गंगागीर महाराज सप्ताह वर्ल्ड रेकॉर्डमध्ये नोंदला जाणार आहे. येत्या आठ ते १५ ऑगस्टदरम्यान राहुरी तालुक्यातील तांदूळनेर-तांभेरे शिवरस्ता खंडोबाचे माळ येथे हा सप्ताह होणार आहे. योगीराज सदगुरू गंगागिरीजी महाराज अखंड हरिनाम सप्ताहाचे यंदाचे १६९ वे वर्ष आहे. श्रीक्षेत्र सात्रळ, सोनगांव, धानोरे, पाथरे बुद्रुक, हनुमंतगांवसह राहाता, राहुरी व संगमनेर तालुक्यांतील २१ गावांच्यावतीने त्याचे आयोजन होते. सराला बेटाचे अधिपती महंत रामगिरीमहाराज यांच्या मार्गदर्शनाखाली व विरोधी पक्षनेते राधाकृष्ण विखे यांच्या सहकार्याने यंदाच्या या उपक्रमाचे आयोजन करण्यात आले आहे. ‘लेने को हरीनाम, देने को अन्नदान आणि तरने को लिनता, डुबने को अभिमान’ अशा या आध्यात्मिक सोहळ्यामध्ये हरिनामासह राज्यस्तरीय कृषी प्रदर्शन, व्यसनमुक्ती, नेत्रदान, जलसाक्षरता, वनसंवर्धन यासह महिला बचत गट प्रदर्शनही होणार आहे. या सप्ताहाची नोंद विश्वविक्रमामध्ये होणार असल्याने वर्ल्ड रेकॉर्ड ऑफ इंडियाचे वरिष्ठ अधिकारी पवनकुमार सोळंकी यांनी नुकतीच त्यांच्या सहकारी अधिकाऱ्यांसह सप्ताहस्थळास भेट देऊन तयारीची पाहणी केली व हा सप्ताह विश्वविक्रमी होण्यासाठी काही सूचना केल्या. सप्ताह कमिटीचे अध्यक्ष गोरक्ष नालकर, विठ्ठलदास आसावा, शैलेश तोष्णीवाल व अजय जाजू यांनी सप्ताहाच्या तयारीचा आढावा त्यांना दिला. त्यानुसार सोळंकी व त्यांचे पथक पाच ऑगस्टपासून सप्ताह परिसरात दाखल होणार आहे. सोळंकी यांनी या सप्ताहातील वेगवेगळ्या उपक्रमांची गिनीज बुक ऑफ वर्ल्ड रेकॉर्ड, लिम्का बुक ऑफ वर्ल्ड रेकॉर्ड, वर्ल्ड रेकॉर्ड ऑफ इंडिया या जागतिक कीर्तीच्या तीन स्तरावर परीक्षण करण्याचा निर्णय घेतला आहे.
गंगागीर सप्ताह विक्रमाच्या दिशेने
सद्गुरू गंगागीर महाराज सप्ताह वर्ल्ड रेकॉर्डमध्ये नोंदला जाणार आहे.
Maharashtra Times 26 Jul 2016, 3:00 am