म. टा. प्रतिनिधी, नगर महापालिके नवे आयुक्त दिलीप गावडे यांनी त्यांच्या कामाची चुणूक दाखवताना आता सेवा सप्ताहासारखा उपक्रम हाती घेतला आहे. आठवड्यातील पहिले पाच दिवस रोज विशेष मोहीम राबविली जाणार आहे. याअंतर्गत आता दर बुधवारी वॉर्डनिहाय अतिक्रमण हटाव मोहीम होणार आहे. याशिवाय संकलित कर वसुली, स्वच्छता मोहीम, टॅक्स अदालत, विभाग आढावा अशी अन्य कामेही आठवड्यातील अन्य दिवशी होणार आहेत. पंधरा दिवसांपूर्वी म्हणजे मागील ९ मे रोजी नवे आयुक्त गावडे नगरला रुजू झाले आहेत. आल्यानंतर नगर महापालिकेची आर्थिक स्थिती पाहताना तब्बल ६० कोटीचे देणे असल्याचे त्यांच्या लक्षात आल्याने त्यांनी गंभीरपणे वसुलीला प्राधान्य देण्याचे ठरवले आहे. मात्र, त्याचवेळी नागरी सुविधा, विस्कळित पाणी पुरवठा, अतिक्रमणांच्या तक्रारी, मोकाट जनावरांच्या तक्रारींसह अन्य सुविधांबाबतही काहीशी बोंबोबोंब असल्याने याकडेही त्यांनी आता लक्ष दिले आहे. या सेवा सुविधांच्या सोडवणुकीसाठी आठवड्यातील प्रत्येकी दिवशी ठराविक काम सर्व विभागांना करण्याचे सांगण्यात आले आहे. आता दर सोमवारी आयुक्त स्वतः सर्व विभागांच्या झालेल्या व प्रलंबित कामांचा आढावा घेणार आहेत. दर मंगळवारी स्वच्छता अभियान, घनकचरा कामे व घरकुल योजनेचा आढावा होणार आहे. दर बुधवारी शहरातील एका प्रभागात अतिक्रमण हटाव मोहीम राबविली जाणार आहे. तर गुरुवारी शहरातील एका वॉर्डात स्वच्छता मोहीम होणार आहे. तर दर शुक्रवारी टप्प्या टप्प्याने वॉर्डनिहाय टॅक्स अदालत भरवली जाणार असून, या प्रक्रियेत संबंधित वॉर्डातील नागरिकांच्या कर आकारणीतील तक्रारींचे निराकरण करून त्यांच्याकडील थकीत रकमेच्या वसुलीला चालना दिली जाणार आहे. दर शनिवारी मात्र कार्यालयीन कामकाजाचे नियोजन करण्यात आले आहे.
नगरमध्ये दर बुधवारी अतिक्रमण हटाव मोहीम
महापालिके नवे आयुक्त दिलीप गावडे यांनी त्यांच्या कामाची चुणूक दाखवताना आता सेवा सप्ताहासारखा उपक्रम हाती घेतला आहे.
Maharashtra Times 28 May 2016, 3:00 am