लेखिका डॉ. देव यांचे प्रतिपादन, 'आनंदोत्सव'चे पुरस्कार वितरण
म. टा. प्रतिनिधी, नगर
'कोणाची माता किंवा कोणाची लेक किंवा कोणाची पत्नी यापेक्षा स्वतःची स्त्री म्हणून ओळख निर्माण करणे अधिक महत्त्वाचे आहे. भारतीय संस्कृतीतही स्त्रीचे हे स्वयंसिद्ध व्यक्तिमत्त्व अधोरेखित केले गेले आहे,' असे प्रतिपादन ज्येष्ठ लेखिका व समीक्षक डॉ. वीणा देव यांनी केले.
येथील आनंदोत्सव चॅरिटेबल ट्रस्टच्या वतीने विविध क्षेत्रांतील ११ जणांना ज्येष्ठ संगीत अभ्यासक डॉ. देवीप्रसाद खरवंडीकर, 'स्नेहालय'चे संस्थापक डॉ. गिरीश कुलकर्णी व ज्येष्ठ साहित्यिक डॉ. लीला गोविलकर यांच्या हस्ते सावेडीच्या रावसाहेब पटवर्धन सभागृहात नुकतेच पुरस्कार वितरण करण्यात आले. त्या वेळी डॉ. देव यांना 'लोपामुद्रा सार्थक जीवनगौरव' पुरस्कार देण्यात आला. त्या वेळी त्या बोलत होत्या. डॉ. संजय कळमकर, जयंत येलूलकर, चंद्रकांत पालवे, सदानंद भणगे, डॉ. सु. प्र. कुलकर्णी, प्राचार्य खासेराव शितोळे, अशोकानंद महाराज कर्डिले, डॉ. संदीप सांगळे, प्राचार्य धोंडीराम वाडकर, प्रा. भीमराव पटारे, डॉ. एम. एस. बागवान, डॉ. अशोक शिंदे आदी उपस्थित होते.
डॉ. देव म्हणाल्या, 'माझ्या पुढे व मागे कर्तृत्ववान प्रसिद्ध व्यक्तिमत्त्व गो. नी. दांडेकर आणि अभिनेत्री मृणाल देव यांचे वलय असूनही माझे एक स्वतंत्र स्थान सांस्कृतिक जीवनात आहे. याकडे 'आनंदोत्सव'च्या पुरस्काराने लक्ष वेधल्याचा विशेष आनंद आहे,' असे त्यांनी आवर्जून स्पष्ट केले. 'आज एकात्म समाज दिसत नाही. माणसांची गर्दी आणि स्वार्थलोलूप शोषण, मूल्यहीनता वाढते आहे. यातून सेवाभावी संवेदनशील संस्था, साहित्यिक, कलावंत, विचारवंत, समाजसेवक मार्ग काढू शकतील,' असे प्रतिपादन 'स्नेहालय'चे डॉ. कुलकर्णी यांनी केले. 'पुरस्काराच्या माध्यमातून सामाजिक ऋणातून उतराई होण्याचा 'आनंदोत्सव'चा प्रयत्न स्तुत्य आहे,' अशी भावना डॉ. खरवंडीकर यांनी व्यक्त केली.
डॉ. अनिरुद्ध मंडलिक, मकरंद घोडके, डॉ. कल्याणी हर्डीकर, पक्षीतज्ज्ञ डॉ. सुधाकर कुऱ्हाडे, माधव संत, कवयित्री गौरी कुलकर्णी, उद्योजक विठ्ठल पाडेकर, प्राचार्य मंजूषा काळे, 'आकांक्षा'च्या संचालक सविता काळे यांना पुरस्कार प्रदान करण्यात आले. ट्रस्टचे विश्वस्त डॉ. अनिल सहस्रबुद्धे, उषा सहस्रबुद्धे व गजेंद्र गाडगीळ यांनी स्वागत केले. प्रा. डॉ. माहेश्वरी गावित, ऋता ठाकूर, प्रा. डॉ. प्रतीक्षा गंगावणे, शोभा ढेपे, प्रा. डॉ. मच्छिंद्र मालुंजकर, ज्योती केसकर, विनायक पवळे आदींनी परिश्रम घेतले. डॉ. राजू रिक्कल यांनी आभार मानले. ल. धों. खराडे, कल्याण गाडे, शांताराम काळे, प्राचार्य प्रकाश टाकळकर, माजी तहसीलदार अनिल सोपळी, सीए हेमंत काळे, डॉ. अशोक लिंबेकर, डॉ. श्रीनिवास भोंग, प्रा. रघुनाथ खरात, डॉ. क्रांतीकला अनभुले, डॉ. श्रीकांत केळकर, अरुण धर्माधिकारी, शब्बीर शेख, प्रमिला तांदुळवाडकर, गायत्री गाडगीळ, मीनाक्षी मालुंजकर, रूपाली रिक्कल, प्रकाश कुलकर्णी, अॅड. रामचंद्र धर्माधिकारी, भारती वेलणकर, निर्मला मांडे, माधवी कुलकर्णी, ज्योत्स्ना कुलकर्णी, अनिता खिस्ती, सुनीता पाटील, सुहासिनी भोग, शोभा कुलकर्णी आदी उपस्थित होते.