बालाजी तांबेंवर सरकारने दाखल केला गुन्हा

मटा ऑनलाइन वृत्त। अहमदनगर

पुत्रप्राप्तीचा प्रचार करुन गर्भलिंगनिदान प्रतिबंधक कायद्याचा भंग केल्या प्रकरणी प्रसिद्ध आयुर्वैद्य बालाजी तांबे यांच्यावर महाराष्ट्र सरकारने संगमनेरच्या कोर्टात गुन्हा दाखल केला आहे. 'आयुर्वैदीय गर्भसंस्कार' या पुस्तकातून पुत्रप्राप्तीचा उपाय सुचवणाऱ्या लेखक बालाजी तांबे यांच्यासह प्रकाशक आणि विक्रेते यांच्यावर देखील गुन्हा दाखल करण्यात आला आहे. बालाजी तांबे आणि संबंधितांवर दाखल केलेला गुन्हा सिद्ध झाल्यास आरोपींना तीन वर्षांपर्यंत तुरूंगवासाची शिक्षा होऊ शकते.

'आयुर्वेदीय गर्भसंस्कार' या पुस्तकाच्या माध्यमातून पु्त्रप्राप्तीचा प्रचार करून गर्भलिंग निदान प्रतिबंधक कायद्याचा भंग केल्याप्रकरणी सामाजिक कार्यकर्ते गणेश बोऱ्हाडे यांनी गेल्या वर्षी नोव्हेंबरमध्ये अहमदनगर जिल्हा शल्यचिकित्सकांकडे पुस्तकाचे लेखक बालाजी तांबे, प्रकाशक आणि विक्रेत्याविरोधात तक्रार दाखल केली होती. यावर संबंधितांकडून खुलासे मागवण्यात आले होते. हा विषय आयुर्वेदशास्त्राशी संबंधित असल्याने महाराष्ट्र आरोग्य विज्ञान विद्यापीठाकडे तज्ञांचे मत घेण्यासाठी पाठवण्यात आले. विद्यापीठाने या प्रकरणाचा अभ्यास करण्यासाठी समिती नेमली. त्यानंतर समितीने दिलेल्या अहवालात बालाजी तांबेंवर पुत्रप्राप्तीचा प्रचार केल्याचा ठपका ठेवण्यात आला. पुत्रप्राप्तीचे उपाय सूचवून लिंगनिवडीबाबतचा बालाजी तांबे यांचा हेतू आहे हे पुस्तकातून सिद्ध असल्याचे समितीने म्हटले आहे. यामुळे पुरूषप्रधानेचा विचार लोकांमध्ये रूजण्याची शक्यता नाकारता येत नसल्याचे म्हटले आहे. या पुस्तकाचा गर्भलिंग निदान प्रतिबंधक कायद्याबाबतच्या जनजागृती मोहिमेवर परिणाम झाल्याचे निरीक्षणही नोंदवण्यात आले आहे. एकूणच या पुस्तकामुळे गर्भलिंग निदान प्रतिबंधक कायद्याचा भंग झाल्याचा निष्कर्ष समितीने काढला आहे.

या अहवालाच्या आधारे पुढील कारवाई करण्यासाठी राज्य आरोग्य सेवेच्या अतिरिक्त संचालक अर्चना पाटील यांचा अभिप्राय मागवल्यानंतर या प्रकरणी योग्य ती कारवाई करावी अशा सूचना पाटील यांनी केल्या. त्यानंतर हा गुन्हा दाखल करण्यात आला.