कोनशिला वादात

म. टा. प्रतिनिधी, नगर
नगरमधील उद्योजक राजेंद्र एकाडे व नंदू एकाडे यांनी स्टेशन रोडवरील जुन्या स्वस्तिक चौकात स्वखर्चाने सुशोभीकरण करून राज पॅलेस चौक असे त्याचे नामकरण केले असले तरी यानिमित्ताने केलेल्या कोनशिलेवरून वादंगाची चिन्हे आहेत. चौक सुशोभीकरणानंतर लोकार्पणासाठी केलेल्या कोनशिलेवर मनपातील सत्ताधारी शिवसेनेच्या महापौर सुरेखा कदम व अन्य प्रमुख पदाधिकाऱ्यांची नावे नसल्याने मनपा प्रशासनाने हॉटेल राज पॅलेसचे व्यवस्थापक नंदू एकाडे यांना नोटिस बजावली आहे. संबंधित कोनशिलेवर आवश्यक तो बदल केला नाही तर तुमच्यावर नियमानुसार कारवाई करण्याचा इशाराही याद्वारे देण्यात आला आहे.
स्टेशन रोडवर नव्या पुणे-औरंगाबाद बसस्थानकासमोर जुना स्वस्तिक चौक आहे. येथे पूर्वी 'ही-मॅन' शिल्प होते. ते हटवून तेथे आता राज पॅलेस चौक असे नामकरण व सुशोभीकरण करण्यात आले आहे. टिळक रोडवरील हॉटेल राज पॅलेसचे संचालक राजेंद्र व नंदू एकाडे यांच्यासह त्यांच्या सहकाऱ्यांनी स्वखर्चाने हे सुशोभीकरण केले आहे. मंगळवारी (५ डिसेंबर) सायंकाळी विधान परिषदेचे आमदार अरुण जगताप यांच्या हस्ते या सुशोभीकरणाचे लोकार्पणही दणक्यात झाले. या पार्श्वभूमीवर मनपाने एकाडेंना नोटिस बजावल्याने राजकीय वर्तुळात खळबळ उडाली आहे. एकाडे हे आमदार जगतापांचे समर्थक मानले जातात, त्यामुळे मनपातील सत्ताधारी शिवसेनेने प्रशासनाद्वारे त्यांना दिलेल्या नोटिशीला जगतापांद्वारे दिल्या जाणाऱ्या प्रत्युत्तराची उत्सुकता शहरात आहे.
मनपात दोन वर्षांपूर्वीची राष्ट्रवादीची सत्ता असताना व त्यावेळी स्थायी समितीच्या सभापतीपदी मनसेचे गणेश भोसले असताना त्यांच्या काळात स्वस्तिक चौकातील 'ही-मॅन' शिल्प हटवून या चौकाचे राज पॅलेस चौक नामकरण व उद्योजक एकाडेंच्या माध्यमातून खासगीकरणातून त्याच्या सुशोभीकरणाचा निर्णय झाला होता. राष्ट्रवादीची सत्ता जाऊन शिवसेनेची सत्ता महापालिकेत आल्यानंतर शिवसेनेचे गटनेते संजय शेंडगे यांनी स्थायी समितीचा यासंबंधीचा ठराव बेकायदेशीर
असल्याने तो विखंडित करण्याचा प्रस्ताव शासनाला पाठविण्याची मागणी मनपा प्रशासनाकडे केली होती. मात्र, त्याकडे प्रशासनाने दुर्लक्ष केले. पण आता टिळक रोडचे सुशोभीकरण व राज पॅलेस चौक वास्तूची उभारणी झाल्यावर तसेच यावर कोनशिला बसवली गेल्यावर वादंग सुरू झाले आहे.