वारकऱ्यांना देणार आरोग्य सुविधा

अहमदनगर

आषाढी एकादशीनिमित्त जिल्ह्यातून वारकरी मोठ्या संख्येने पंढरपूरला जात असतात. या वारकऱ्यांना जिल्हा परिषदेच्या आरोग्य विभागाकडून आरोग्य सुविधा दिल्या जाणार आहेत. या बाबत विभागाने नियोजन करण्याच्या सूचना आरोग्य समितीच्या सभेत देण्यात आल्या.

आरोग्य विभागातील बहुतांश पदे रिक्त आहेत. त्यामुळे कामकाजावर ताण येत आहे. ग्रामीण भागात आरोग्य सेवा देताना अडचणी निर्माण होत आहेत. या रिक्त जागा भरण्यासाठी सरकारकडे विनंती करण्याचा ठराव या सभेत घेण्यात आला. पावसाळ्याच्या दिवसात सर्पदंशाचे प्रमाण वाढत असते. त्यामुळे जिल्ह्यातील सर्व प्राथमिक आरोग्य केंद्र व जिल्हा स्तरावर पुरेशा प्रमाणात लसी व औषधे ठेवावीत, साथरोग नियंत्रणाबाबत उपाययोजना करण्याच्या सूचना देण्यात आल्या. गावांत दुषित पाणीपुरवठा होत असल्याच्या तक्रारी केल्या जातात. तेव्हा या दूषित पाणी असणाऱ्या गावांत आवश्यक उपाययोजना करण्याच्या सूचना अधिकाऱ्यांना देण्यात आल्या. जिल्ह्यात आरोग्य केंद्रांचे बांधकाम सुरू आहे. या कामकाजाचा सभेत आढावा घेण्यात आला. प्राथमिक आरोग्य केंद्र व उपकेंद्रांच्या इमारतींचे बांधकाम तत्काळ पूर्ण करण्याच्या सूचना देण्यात आल्या. या सभेस सदस्य, पदाधिकारी उपस्थित होते.