पांढरीपुलाच्या घाटात रास्ता रोको

म. टा. वृत्तसेवा, नगर

इमामपूर घाटातील धार्मिक स्थळाच्या परिसरात मांस टाकल्याच्या आरोपावरून हिंदु राष्ट्र सेनेच्या कार्यकर्त्यांनी गुरुवारी सायंकाळी सहाच्या सुमारास पांढरीपुलाच्या घाटात रास्ता रोको आंदोलन केले. संबंधितांविरोधात गुन्हा दाखल करून कठोर कारवाई करण्याच्या आश्वासनानंतर आंदोलन मागे घेण्यात आले.

इमामपूर घाटाच्या माथ्यावर असलेल्या धार्मिक स्थळाच्या परिसरात दुपारच्या सुमारास एका टेम्पोतून येऊन मांस टाकल्याचे निदर्शनास आले. घटनेची माहिती समजल्यानंतर हिंदु राष्ट्र सेनेचे कार्यकर्ते घटनास्थळी आले. धार्मिक स्थळासमोर गोमांस टाकल्याचा आरोप करून संबंधित टेम्पोचालकाविरोधात गुन्हा दाखल करण्याच्या मागणीसाठी पांढरीपुलाच्या घाटात रास्ता रोको आंदोलन सुरू केले. आंदोलनामुळे रस्त्याच्या दोन्ही बाजूंना वाहनांच्या रांगा लागल्या होत्या. दरम्यानच्या काळात पंचायत समिती सदस्य गोविंद मोकाटे व एमआयडीसी पोलिसांचे पथक घटनास्थळी दाखल झाले. या प्रकरणी संबंधित टेम्पोचालकाविरोधात गुन्हा दाखल करून कठोर कारवाई करण्याचे आश्सासन दिल्यानंतर सुमारे पाऊण तासानंतर आंदोलन संपले. याप्रकरणी रात्री उशिरापर्यंत एमआयडीसी पोलिसात गुन्हा दाखल झालेला नव्हता.