Historic Mosque नगरजवळ ४५० वर्षांपूर्वीची मशिद कोसळली; ट्रस्टने घेतली शंका

नगर: अहमदनगर जवळील शहापूर या गावातील ऐतिहासिक मशीद शुक्रवारी रात्री पावसामुळे कोसळली. सुमारे साडेचारशे वर्षांपूर्वी ' चांदबीबी महाल 'चे (सलाबत खानाची कबर) बांधकाम सुरू असताना डोंगराच्या पायथ्याशी असलेल्या शहापूर गावात ही मशीद बांधण्यात आली होती. पावसामुळे मशिदीचा समोरचा बराचसा भाग कोसळला आहे. ( Ahmednagar Historic Mosque Collapsed )

वाचा: सार्वजनिक नमाजवर बंदी; बकरी ईद घरीच

नगर-पाथर्डी रस्त्यावर चांदबीबी डोंगराच्या पायथ्याशी शहापूर नावाचे गाव आहे. महालाचे काम सुरू असताना शहापूर आणि मेहेकरी येथे मशिदी बांधण्यात आल्या होत्या. नगर शहर आणि परिसरातील जुन्या वास्तुंपैकी या वास्तू आहेत. शहापूर गावातील मशीद अनेक दिवस बंदच होती. या गावात मुस्लिम कुटुंब नसल्याने तेथे नमाज पठण होत नसे. मात्र, नगरहून काही मंडळी तेथे जात होती. गेल्या वर्षभरापासून मात्र तेथे कोणीही जात नसल्याचे सांगण्यात आले. मधल्या काळात मशिदीसमोरील छोट्या मंदिरावरून वादही निर्माण झाला होता. मशिदीचे ट्रस्टी नगर शहरात राहतात. त्या ट्रस्टलाही हरकत घेण्यात आलेली आहे.

वाचा: बकरी ईदच का? राम मंदिराचं भूमिपूजनही प्रतिकात्मक करा

जोरदार पावसामुळे या मशिदीचा पुढचा भाग कोसळला आहे. आता मशिदीच्या दुरूस्तीचे काम ट्रस्ट आणि लोकवर्गणीतून करण्याची तयारी सुरू करण्यात आली आहे. त्यासाठी पोलीस बंदोबस्त आणि परवानगी देण्याची मागणी ट्रस्टींनी केली आहे. ही मशीद पावसामुळे पडल्याचे दिसत असले तरी यामागील कारणाचा नेमका शोध घेण्याची मागणीही ट्रस्टी निसार पोवार (बाटलीवाला) यांनी पोलिसांकडे केली आहे. त्या काळात बांधण्यात आलेल्या बहुतांश इमारती अद्याप सुस्थितीत असल्याने शंका वाटत असल्याचे ट्रस्टींचे म्हणणे आहे. मशीद दुरूस्तीसाठी वक्फ बोर्डाकडेही अर्ज करण्यात येणार असल्याचे सांगण्यात आले.

या ठिकाणाच्या शेजारूनच नगर-पाथर्डी रस्ता गेला आहे. याच्या रुंदीकरणाचे काम सुरू आहे. तेथील वळण काढून टाकण्यासाठी रस्ता आणखीच जवळ आलेला आहे. तेथून चांदबीबी महालाकडे जाताना जुन्या पद्धतीचे घुमटाकार बांधकाम असलेल्या या मशिदीसमोरूनच जावे लागते. रस्त्याच्या बाजूचा भाग पावसामुळे कोसळला आहे.

वाचा: भाजप आणि फडणवीसांनी करोना संकटात राजकारण करू नये; पवार चिडले