महावितरण अध्यक्षांचा निर्णयऽ देखभाल-दुरुस्तीची कामे होणार
म. टा. प्रतिनिधी, नगर
औद्योगिक क्षेत्रातील वीजपुरवठा आता महिन्यातून फक्त एक दिवसच बंद ठेवून त्याच दिवशी स्वतंत्र यंत्रणा लावून देखभाल दुरुस्तीची कामे करण्याचा निर्णय महावितरणचे अध्यक्ष व व्यवस्थापकीय संचालक संजीव कुमार यांनी घेतला आहे. हा निर्णय जाहीर करताना महावितरणच्या अधिकाऱ्यांनी यानुसार औद्योगिक वीजपुरवठा सुरळीत राहण्याबाबत दक्षता घेण्याच्या सूचनाही केल्या.
संजीव कुमार यांनी पुणे व कोकण प्रादेशिक विभागातील औद्योगिक ग्राहकांशी मुंबईतील प्रकाशगड मुख्यालयातून व्हिडिओ कॉन्फरन्सद्वारे थेट संवाद साधला. औद्योगिक ग्राहक संघटना व त्यांच्या प्रतिनिधींसह पुणे आणि कोकण प्रादेशिक विभागामधील ठाणे, वाशी, पुणे, नाशिक, कोल्हापूर, सोलापूर, सातारा, अहमदनगर, सांगली, जळगाव, रत्नागिरी, उल्हासनगर, डोंबिवली, शहापूर, मुरबाड, महाड, वसई, मालेगाव, कुपवाड, मिरज आदी ठिकाणच्या औद्योगिक ग्राहक प्रतिनिधींनी या संवादात भाग घेतला.
देखभाल दुरुस्तीच्या कामाचे योग्य नियोजन करून या कामासाठी औद्योगिक ग्राहकांचा वीजपुरवठा महिन्यातून एकदाच बंद करण्यात येईल, असे संजीवकुमार यांनी यावेळी जाहीर केले. तसेच याबाबत योग्य ती खबरदारी घेण्याबाबत क्षेत्रिय कार्यालयांना सूचना करताना या महिन्यातून एकदाच होणाऱ्या देखभाल दुरुस्ती कामासाठी स्वतंत्र कर्मचारी नेमण्याचे आवर्जून सांगितले. महाराष्ट्रातील उद्योजकांना सर्वोत्कृष्ट वीज सेवा देण्यास महावितरण कटीबद्ध असल्याची ग्वाहीही त्यांनी दिली.
विविध प्रश्नांवर चर्चा
कुमार यांनी मोबाइल व्हॅन, मीटर्स, फिडर सेपरेशन करणे, पायाभूत सुविधांची उभारणी आदी विषयांबाबत उद्योजकांनी चर्चा करून महावितरणच्या सेवेत आणखी सुधारणा करण्याच्या सूचना केल्या. तसेच एमआयडीसी व महापारेषण कंपनीच्या अखत्यारितील मागण्यांबाबत विशेष प्रस्ताव सादर करणे, त्यांच्यासमवेत समन्वय बैठक घेऊन तातडीने उपाययोजना करण्याबाबतही सुचना दिल्या. औद्योगिक ग्राहकांसाठी राज्यभरात मीटरचा पुरवठा मुबलक करण्यात आला असून नवीन औद्योगिक ग्राहकांनी वीजजोडणीचा अर्ज ऑनलाइनच करावा, असेही आवाहन संजीव कुमार यांनी या वेळी केले. या थेट संवाद उपक्रमास संचालक (संचालन) दिनेशचंद्र साबू, संचालक (वाणिज्य) सतीश चव्हाण, संचालक (प्रकल्प) भालचंद्र खंडाईत व महावितरणचे वरिष्ठ अधिकारी उपस्थित होते.