म. टा. प्रतिनिधी, नगर
होमगार्डचे जिल्हा समादेशकपद आता मानसेवीऐवजी कायमस्वरूपी पगारी करण्यात येणार आहे. राज्यभरात ३४ पदांना मंजुरी देण्यात आली आहे. यासाठीची भरती प्रक्रिया लवकरच हाती घेण्यात येणार असून, तोपर्यंत या पदावर पोलिस उपअधीक्षकांना प्रतिनियुक्ती देण्यात येणार आहे.
राज्याच्या गृहविभागाने एका परिपत्रकाद्वारे ही माहिती दिली. होमगार्डसाठी (गृहरक्षक दल) जिल्हास्तरावर कार्यालयप्रमुख म्हणून काम पाहण्यासाठी जिल्हा समादेशक पद आहे. त्यावर आतापर्यंत मानधनावर नियुक्ती केली जात होती. 'अ' वर्ग दर्जा असलेल्या या पदावरील व्यक्तीला पोलिस अधीक्षकांप्रमाणेच दर्जा होता. मात्र, मानधनावर काम करणाऱ्या या अधिकाऱ्याच्या हाताखाली कायमस्वरूपी सरकारी कर्मचारी आहेत. त्यामुळे कामासंबंधी अनेकदा वादही झालेले आहेत. याशिवाय मानधनावर काम करण्यास फारसे कोणी तयार होत नसल्याने अगर अन्य काही कारणांमुळे बहुतांश जिल्ह्यातील या जागा रिक्त आहेत. त्यामुळे हे पद मानसेवीऐवजी कायमस्वरूपी करण्यात यावे, असा प्रस्ताव होता.
होमगार्ड आणि पोलिस पाटील यांच्यासंबंधी निर्णय घेण्यासाठी सरकारने एक मंत्री उपसमिती नियुक्त केली होती. त्या समितीसमोर हे प्रकरण पाठविण्यात आले. समितीने जिल्हा समादेशकांची ३४ पदे कायमस्वरूपी करण्यास मंजुरी दिली आहे. आता या ३४ पदांवर पगारी अधिकाऱ्यांची नियुक्ती होणार असून, गट 'अ'मधील या अधिकाऱ्यांप्रमाणे त्यांनाही सहाव्या वेतन आयोगानुसार पगार दिला जाणार आहे. यासाठी भरती प्रक्रिया राबविण्यात येईल. मात्र, तोपर्यंत या पदावर पोलिस उपअधीक्षकांना प्रतिनियुक्ती देण्यात येणार आहे. प्रशिक्षण पूर्ण करून सेवेत दाखल होणाऱ्या उपअधीक्षकांना या पदावर एक वर्ष सक्तीने नियुक्ती देण्यात येणार आहे. असे उपअधीक्षक उपलब्ध होईपर्यंत सध्याचे मानसेवी अधिकारीच कार्यरत राहणार असल्याचेही आदेशात स्पष्ट करण्यात आले आहे.
..............