बेकायदा विक्री होणारे स्पिरिटचे रॅकेट उघडकीस
म. टा. प्रतिनिधी, नगर
पंजाब येथून तमिळनाडू राज्यात वाहतूक पासावर जाणाऱ्या स्पिरिटच्या टँकरमधून बेकायदा स्पिरिट काढून ते बेकायदा दारू बनविण्यासाठी वापरण्यात येत असल्याचे उघडकीस आले आहे. राज्य उत्पादन शुल्क विभागाने राहुरी व राहाता येथे बेकायदा स्पिरिट विकणारे तब्बल तीन टँकर जप्त केले असून, तब्बल १ कोटी २० लाख रुपये किमतीचे स्पिरिट जप्त केले आहे. तर स्पिरिट विकणारे टँकर चालक व विकत घेणारे स्थानिक अशा नऊ जणांना पकडण्यात आले आहे.
गेल्या आठवड्यात नगर शहरातील एका ठिकाणी बनावट दारू पकडली होती. त्यात दोन आरोपींना अटक केल्यानंतर स्पिरिट पुरवठ्याचे रॅकेट उघडकीस आले. त्यानंतर रविवारी रात्री हे स्पिरिट पकडण्यासाठी राज्य उत्पादन शुल्क विभागाची पथके कामाला लागली होती. टोलनाका, अनेक धाब्यांवर उत्पादन शुल्क विभागाचे अधिकारी व कर्मचारी थांबले होते. त्यानुसार राहुरी व राहाता या भागात महामार्गावर थांबून उत्पादन शुल्क विभागाने स्पिरिट भरलेले तीन टँकर पकडले. तर हे स्पिरिट विकत घेण्यासाठी आलेल्या एक टाटा सुमो व एक इनोव्हा गाडी पकडली. या टँकरचालकाकडून उत्पादन शुल्कच्या अधिकाऱ्यांनी चौकशी केल्यानंतर भरलेले टँकरचे सील तोडून बेकायदा स्पिरीटची विक्री करत असल्याची उघडकीस आले. पंजाबमधील पटियाला स्टिस्टिलरी येथून रेफ्टीफाईंड स्पिरिटचे तीन टँकरने भरून तमिळनाडू राज्यात वाहतूक पासवर जात होते. टँकरचे चालक नगर जिल्ह्यात राहुरी व राहाता परिसरात आल्यानंतर टँकरचे सील तोडून स्पिरिटची चोरून विक्री करत होते. टँकरमधून पाचशे ते हजार लिटर स्पीरिट काढून ते विकत असल्याचे उघडकीस आले. याप्रकरणी टँकरचालक सोडिराम सरदारुराम लालके, नरेंद्रसिंग श्रीकरनसिंग, मजदिरसिंग गुरमेजसिंग गोमन, पुष्पेंद्र मुकेश दाहिया, राकेशकुमार केवलप्रसाद दाहिया यांच्यासह विकत घेणारे स्थानिक व्यक्ती परेश्वर येडुबा गुंजाळ, सुनील रामभाऊ वाघ, भाऊसाहेब मधुकर गोरे यांना अटक करण्यात आली आहे. स्थानिक व्यक्ती हे स्पिरिट बेकायदा दारूनिर्मिती करणाऱ्यांना पुरवत होते, असे चौकशीत उघडकीस आले आहे. १ कोटी २० लाख रुपये किमतीचे तब्बल ८९ हजार २०० बल्क लिटर स्पिरिट व वाहने जप्त करण्यात आली आहेत. यानंतर जिल्हाधिकारी राहुल द्विवेदी, उत्पादन शुल्कचे विभागीय उपायुक्त प्रसाद सुर्वे यांनी राहुरी येथे जाऊन जप्त केलेल्या टँकरची पाहणी केली.
या पथकाची कामगिरी
राज्य उत्पादन शुल्कचे अधीक्षक पराग नवलकर यांच्या नेतृत्वाखाली निरीक्षक संजय सराफ, नंदकुमार जाधव, भैय्यासाहेब घोरतळे, अनिल पाटील, अण्णासाहेब बनकर, ए. आर. कुसळे, पी. बी. अहिरराव, उत्तम बर्डे, रुपेश चव्हाण यांच्या पथकाने ही विशेष कामगिरी केली.
टँकरमध्ये पाणी ओतायचे
टँकरमधून स्पिरिट काढल्यानंतर त्यामध्ये टँकर ड्राइव्हर पाणी ओतून पुन्हा टँकरचे सिल पॅक करून घेत होते. या पद्धतीने अनेक दिवसांपासून स्पिरिटची बेकायदा विक्री करत होते, असे राज्य उत्पादन शुल्क विभागाच्या चौकशीत समोर आले आहे.