म. टा. प्रतिनिधी, नगर
शनिवारी नगर शहरात रमजान ईद उत्साहात साजरी करण्यात आली. शहरातील ईदगाह मैदानावर सकाळी सामुदायिक नमाज पठण झाले. त्यानंतर नागरिकांनी एकमेकांना 'ईद मुबारक'म्हणत शुभेच्छा दिल्या. जिल्हा पोलिस विभाग व शांतता समितीच्या वतीनेही पोलिस अधीक्षक रंजनकुमार शर्मा यांच्या हस्ते मुस्लिम बांधवांना गुलाब पुष्पांचे वाटप करीत ईदच्या शुभेच्छा देण्यात आल्या.
रमजान ईदनिमित्त नमाज पठण करण्यासाठी ईदगाह मैदान येथे मुस्लिम बांधवांची शनिवारी सकाळी गर्दी झाली होती. मैदान परिसरात मोठ्या प्रमाणात पोलिस बंदोबस्त तैनात करण्यात आला होता. मैदानाबाहेर असणाऱ्या नगर-पुणे महामार्गावरदेखील नमाजपठण केले जात असल्यामुळे या महामार्गावरील वाहतूक वळवण्यात आली होती. मैदानावर सामुदायिक नमाजपठण झाल्यानंतर एकमेकांची गळाभेट घेत 'ईद मुबारक' अशा शुभेच्छा देण्यात येत होत्या. जिल्हा पोलिस विभाग व शांतता समितीच्या वतीनेही पोलिस अधीक्षक रंजनकुमार शर्मा, माजी महापौर अभिषेक कळमकर, राष्ट्रवादीचे शहर जिल्हाध्यक्ष प्रा. माणिक विधाते, हरजितसिंग वधवा, उबेद शेख, अॅड. शिवाजी कराळे यांच्या हस्ते मुस्लिम बांधवांना गुलाब पुष्पांचे वाटप करीत ईदच्या शुभेच्छा दिल्या.
प्रेस क्लबतर्फे ईद मिलन कार्यक्रम आयोजित करण्यात आला होता. या कार्यक्रमाला जिल्हा पोलिस अधीक्षक रंजनकुमार शर्मा यांची प्रमुख उपस्थिती होती. 'मानवता हेच सर्व धर्माचे सार असून, ईद मिलनसारख्या कार्यक्रमातून सामाजिक एकोपा वृद्धिंगत होत असतो. या दृष्टीने प्रेस क्लबने राबविलेला उपक्रम पथदर्शी आहे,' अशा भावना त्यांनी व्यक्त केली. याप्रसंगी समाजसेवक राजाराम भापकर गुरुजी, अतिरिक्त पोलिस अधीक्षक घनश्याम पाटील, सहायक पोलिस अधीक्षक अक्षय शिंदे, स्थानिक गुन्हे शाखेचे पोलिस निरीक्षक दिलीप पवार, कोतवालीचे पोलिस निरीक्षक रमेश रत्नपारखी, हरजितसिंग वधवा, कलिम मर्चंट, जिल्हाधिकाऱ्यांचे स्वीय सहायक सुरेश आघाव उपस्थित होते.
जिल्हाधिकारी राहुल द्विवेदी शासकीय दौऱ्यामुळे बाहेरगावी गेल्याने त्यांनी दुपारी उशिरा प्रेस क्लबच्या ईद मिलन कार्यक्रमास हजेरी लावली. पाहुण्यांचे स्वागत मन्सुर शेख यांनी केले, तर प्रास्ताविक महेश देशपांडे यांनी केले.
......