म. टा. प्रतिनिधी, नगर
पोलिस अधीक्षक कार्यालय तोडफोड प्रकरणातील आरोपी नगरसेवक कैलास गिरवले यांचा रक्तदाब कमी झाल्याने त्यांना रविवारी पुणे येथील ससून रुग्णालयात दाखल करण्यात आले आहे. गिरवले यांना पोलिसांनी आणखी एका गुन्ह्यात वर्ग केले आहे.
पोलिस अधीक्षक कार्यालय तोडफोड प्रकरणामध्ये गिरवले यांना न्यायालयीन कोठडी मिळाल्याने त्यांची रवानगी कारागृहात करण्यात आली होती. त्यातच मागील आठवड्यात सहायक पोलिस अधीक्षक अक्षय शिंदे यांच्या पथकाने माळीवाडा भागात छापा टाकून एका गाळ्यातून फटाके, सुगंधी तंबाखू, सुपारी, असा बेकायदा साठा जप्त केला होता. या गुन्ह्यात पोलिसांनी कैलास गिरवलेसह इतर तीन जणांना आरोपी केले आहे. या गुन्ह्यामध्ये गिरवले यांना वर्ग करून त्यांना न्यायालयासमोर हजर करण्यात आले असता त्यांना पोलिस कोठडी मिळाली होती. परंतु रविवारी सकाळी त्यांची प्रकृती खालावल्याने त्यांना जिल्हा रुग्णालयात दाखल करण्यात आले. त्यानंतर त्यांना ससून रुग्णालयात नेण्यात आले असून त्यांच्यावर उपचार सुरू आहेत. .