मनपा प्रभारी उपायुक्तांच्या
कारभारावर संशय व्यक्त
म. टा. प्रतिनिधी, नगर
महापालिकेच्या प्रभारी उपायुक्तपदी नियुक्त करण्यात आलेले वरिष्ठ लिपिक दिगंबर कोंडा यांच्या कारभाराबद्दल नगरसेवकांनी संशय व्यक्त केला आहे. प्रभारी उपायुक्तपदाचा कारभार हाती घेतल्यानंतर कोंडा यांनी हजारो फायलींवर सह्या केल्या असून, यातील अनेक फायली वादग्रस्त कामांच्या असल्याचा दावाही नगरसेवकांनी केला. त्यावर, संबंधित कामांची बिले अदा करण्याआधी कामांची परिपूर्ण तपासणी करण्याची ग्वाही आयुक्त घनश्याम मंगळे यांनी दिली आहे.
मनपाचे उपायुक्त (कर) राजेंद्र चव्हाण यांची नांदेडच्या जिल्हा प्रशासन अधिकारीपदी बदली झाली आहे. मात्र, ही बदली होण्याआधी सुमारे ८-१० दिवसांपासून ते रजेवर आहेत. मनपातील पथदिवे घोटाळ्यात त्यांच्यावरही अनियमिततेचा ठपका ठेवण्यात आला आहे. त्यामुळे ते रजेवर गेले होते व आता त्यांची बदलीच झाली आहे. या पार्श्वभूमीवर मार्चएंडमुळे मनपाची कामे अडून राहू नये म्हणून त्यांच्या रिक्त जागी पाणीपुरवठा विभागाचे वरिष्ठ लिपिक दिगंबर कोंडा यांची प्रभारी उपायुक्त म्हणून आयुक्त घनश्याम मंगळे यांनी नियुक्ती केली आहे. पदोन्नतीसाठी मागील सात-आठ वर्षांपासून प्रतीक्षेत असलेल्या कोंडा यांना अचानक व थेट उपायुक्तपदीच नियुक्ती मिळाल्याने ते आनंदात आहेत. पण या पदाचा पदभार घेतल्यानंतर मनपातील ठेकेदारांचा गराडा त्यांना व त्यांच्या दालनात दिवसभर असतो. अनेक फायलींवर त्यांच्या जोरात सह्या सुरू आहेत. या पार्श्वभूमीवर महासभेत या विषयावर नगरसेवकांनी चर्चा छेडून कोंडा यांचे सह्या ठोकण्याचे प्रकरण वादग्रस्त होण्याची भीतीही व्यक्त केली.
शिवसेनेचे नगरसेवक अनिल शिंदे व मनसेचे कैलास गिरवले यांनी कोंडा यांच्या कामकाज पद्धतीवर आक्षेप घेतले. मनपात ४० लाखांचा पथदिवे घोटाळा नुकताच उघड झाला आहे. या पार्श्वभूमीवर कोंडा यांनी मागील तीन-चार दिवसात हजारो फायलींवर सह्या केल्या आहेत, यात पथदिव्यांची अनेक कामे आहेत व त्यापैकी काही फायली मागील उपायुक्तांनी संशयास्पद म्हणून बाजूला ठेवल्या होत्या. अशा स्थितीत ही कामे मंजूर होऊन त्यांची मार्चएंड आधी बिले निघून आणखी लाखोंचा घोटाळा होऊ शकतो, अशी भीती व्यक्त केली. असे काही झाले तर त्याला आयुक्त जबाबदार असतील, असेही स्पष्ट केले गेले. यावर बोलताना आयुक्त मंगळे यांनी, संबंधित मंजूर फायलींतील विकास कामांची बिले देण्याआधी परिपूर्ण तपासणी केली जाणार आहे. कोंडा यांनाही नियमानुसार व प्रचलित प्रशासकीय पद्धतीचा अवलंब करून कामे मंजूर करण्याच्या सूचना दिल्या असल्याचेही त्यांनी स्पष्ट केले.