निवडणूक विभागाकडून प्रारुप मतदार यादी प्रसिद्ध
म. टा. प्रतिनिधी, नगर
निवडणूक विभागाने प्रारुप मतदार यादी प्रसिद्ध केली आहे. त्यामुळे मतदारांमध्ये जागृती करण्यासोबतच मतदार नावनोंदणी करण्यासाठी राजकीय पक्ष, विद्यार्थी संघटना यांनी पुढाकार घेतला आहे. भारतीय कम्युनिस्ट पक्षासह ऑल इंडिया युथ फेडरेशन, क्रांतीसिंह पुरुष बचतगट यांनी यासाठी प्रेमदान चौक येथे नवमतदारांची नोंदणी करण्यासाठी सोय केली आहे.
भारत निवडणूक आयोगाच्या निर्देशानुसार जिल्ह्यात एक जानेवारी २०१९ या अर्हता दिनांकावर आधारित छायाचित्र मतदार याद्यांचा सखोल पुनरीक्षण कार्यक्रम जाहीर करण्यात आला आहे. त्याअंतर्गत शनिवारी प्रारुप मतदार यादी प्रसिद्ध करण्यात आली. प्रारुप मतदार यादी प्रसिद्ध करण्यापूर्वी जिल्हा निवडणूक शाखेने राजकीय पक्षांच्या जिल्हाध्यक्षांसाठी बैठक घेतली होती. या बैठकीमध्ये मार्गदर्शन करताना जिल्हाधिकारी राहुल द्विवेदी, उपजिल्हा निवडणूक अधिकारी अरुण आनंदकर यांनी राजकीय पक्षांनी मतदारांमध्ये जागृती करण्यासाठी पुढाकार घ्यावा, असे आवाहन केले होते. या आवाहानाला प्रतिसाद देत भाकप, ऑल इंडिया युथ फेडरेशन यांनी क्रांतीसिंह खुल्या वाचनालयाच्या माध्यमातून मतदार जागृती व नावनोंदणी अभियान सुरू केले आहे. या अभियानांतर्गत प्रेमदान चौकामध्ये तीन ते आठ सप्टेंबर याकाळात सकाळी दहा ते अकरा व सायंकाळी सहा ते सात या वेळेत नवमतदारांची नावनोंदणी करण्यात येणार आहे. दिव्यांग (अपंग) मतदारांसाठी विशेष मतदार नोंदणी होणार असून त्यांच्या अडीअडचणी सोडविण्यासाठी येथे प्रयत्न करण्यात येणार आहेत. हा उपक्रम यशस्वीतेसाठी संतोष गायकवाड, दत्ताभाऊ वडवणीकर, एआयवायएफचे जिल्हाध्यक्ष दिपक शिरसाठ, उपाध्यक्ष अमोल चेमटे, अरुण थिटे, तुषार सोनवणे, कार्तिक पासलकर, विकास गेरंगे, विजय केदारे, चंद्रकांत माळी, रामदास वागस्कर, भैरवनाथ वाकळे, सागर लोखंडे, रतन गायकवाड, अभिजित वाघ, एकनाथ सोनवणे परिश्रम घेत आहेत.