दोन अधिकाऱ्यांची नियुक्ती
म. टा. प्रतिनिधी, नगर
महापालिकेच्या बुरुडगाव व सावेडी कचरा डेपोतील खतनिर्मिती प्रकल्पांतील घोटाळ्यांच्या चौकशीसाठी आयुक्त-जिल्हाधिकारी राहुल द्विवेदी यांनी दोन अधिकाऱ्यांची नियुक्ती केली आहे. राहुरीचे आमदार शिवाजी कर्डिले यांनी या खत प्रकल्पांबाबत मुख्यमंत्री देवेंद्र फडणवीस यांच्याकडे तक्रार केली होती. त्यांच्या आदेशानुसार द्विवेदींनी चौकशी सुरू केली असून, दोन अधिकारी यासाठी नियुक्त केले आहेत.
मनपाचे सावेडी व बुरुडगाव कचरा डेपोतील खत प्रकल्प कागदपत्री सुरू आहेत, अपात्र संस्थेची निविदा मंजूर केली गेली आहे, या प्रकल्पासाठी मनपाने ६० लाख ७५ हजार रुपये दिले असून, सावेडीसाठी १ कोटी २१ लाखाची यंत्रसामग्री खरेदी केली आहे, या खरेदीवर व्हॅट कर भरलेला नाही, विक्री करण्यात आलेल्या खताच्या पावत्यांमध्ये घोटाळा आहे, अशा विविध तक्रारी आमदार कर्डिले यांनी मुख्यमंत्री फडणवीस यांच्याकडे केल्या आहेत. या तक्रारींनुसार चौकशीचे आदेश फडणवीस यांनी दिल्याने उपसचिवांकडून तसे आदेश आयुक्त-जिल्हाधिकारी द्विवेदी यांना देण्यात आले असून, तातडीने अहवाल पाठवण्याचे सांगण्यात आले आहे. या आदेशानुसार द्विवेदी यांनी या तक्रारींच्या चौकशीसाठी मनपाचे मुख्य लेखाधिकारी व महाराष्ट्र जीवन प्राधिकरणाचे कार्यकारी अभियंता यांना चौकशी प्राधिकारी म्हणून नेमले असून, सखोल चौकशी करून अहवाल देण्याचे आदेश दिले आहेत. दरम्यान, सरकारच्या प्रधान सचिवांनी तीनवेळा आदेश देऊनही मनपाच्या आयुक्तांनी या तक्रारींवर कारवाई केलेली नाही तसेच लाचलुचपत प्रतिबंधक विभागानेही दीड वर्षात चौकशी करून कारवाई केली नसल्याचे म्हणणे आमदार कर्डिले यांनी मुख्यमंत्र्यांकडे केलेल्या तक्रारीत मांडले आहे.
---