म. टा. प्रतिनिधी, नगर
शहर सहकारी बँकेतील वैद्यकीय मशिनरी कर्जवाटपप्रकरणी आता आर्थिक गुन्हे शाखेने एम्स हॉस्पिटलच्या भागिदार डॉक्टरांची चौकशी सुरू केली आहे. या गुन्ह्याच्या तपासासाठी भागिदार डॉक्टरांकडून मिळणारी माहिती महत्त्वाची असून, यात वीस भागिदार डॉक्टर असून, या डॉक्टरांची चौकशी करून जबाब नोंदविण्यात येणार आहेत. नगर एम्स हॉस्पिटलचे डॉ. नीलेश शेळके याने वैद्यकीय मशिनरी खरेदी करण्याच्या नावाखाली बोगस कर्जप्रकरण तयार करून तीन भागिदार डॉक्टरांची सतरा कोटी रुपयांची आर्थिक फसवणूक केली असून, डॉ. शेळकेसह शहर सहकारी बँकेचे संचालक मंडळ, मशिनरी डीलर, सीए आदींविरुद्ध कोतवाली पोलिस ठाण्यात गुन्हा दाखल करण्यात आला आहे. या गुन्ह्याचा तपास आर्थिक गुन्हे शाखेच्या पोलिस उपअधीक्षक प्रांजल सोनवणे हे करीत आहेत. 'एम्स' हॉस्पिटलमधील सर्व भागिदार डॉक्टरांची चौकशी करण्यात येणार आहे. ज्यांनी पोलिस ठाण्यात फसवणूक झाल्याची फिर्याद दिलेली नाही, अशाही सर्व भागिदारांच्या चौकशीचे काम सुरू आहे. काही डॉक्टरांचे जबाब नोंदविले आहेत. उर्वरित डॉक्टरांचे जबाबही आर्थिक गुन्हे शाखेकडून नोंदविण्यात येणार आहेत. भागिदारांकडून 'एम्स' हॉस्पिटलमधील व्यवहार, वैद्यकीय मशिनरी आदींबाबत माहिती घेतली जात आहे. त्यानंतर डॉक्टरांचे पुन्हा जबाब नोंदविले जातील. तर फसवणूकप्रकरणी फिर्याद देणाऱ्या डॉक्टरांचे पुन्हा जबाब नोंदविण्यात आला आहे. गुन्ह्याचा सूत्रधार डॉ. नीलेश शेळके याने नियमित जामिनासाठी न्यायालयात अर्ज दाखल केला असून, त्यावर पुढील आठवड्यात सुनावणी होणार आहे.