आयपीएल सामन्यांवर नगरमध्ये सट्टेबाजी

नगर : आयपीएलच्या सामन्यांवर सट्टेबाजी खेळली जात असून, शहरातील एक प्रकरण स्थानिक गुन्हे शाखेने उघडकीस आणले आहे. केडगाव येथील एका घरावर छापा टाकून पोलिसांनी सट्टेबाजीसाठी वापरणारे मोबाइल फोन, टीव्ही सेट असे ५८ हजार रुपयांचे साहित्य जप्त केले आहे. यात एकाला अटक करण्यात आली असून, एक जण फरार झाला आहे. बुधवारी रात्री झालेल्या दिल्ली विरुद्ध हैदराबाद सामन्यादरम्यान ही कारवाई झाली.

केडगाव येथील घेंबुड मळा येथील सोनू नामदेव घेंबुड याला अटक झाली आहे. तर सारसनगर येथील स्वप्नील पर्वते (रा. सारसनगर) हा फरार झाला आहे. घेंबुड मळा येथील इमारतीच्या दुसऱ्या मजल्यावरील घरात सामन्यांवर सट्टा लावला जात असल्याची माहिती स्थानिक गुन्हे शाखेला मिळाली होती. त्यानुसार पोलिस उपनिरीक्षक राजकुमार हिंगोले, पोलिस हेडकॉन्टेबल योगेश गोसावी, उमेश खेडकर, रोहिदार नवगिरे, पोलिस नाईक संदीप पवार यांच्या पथकाने या घरावर छापा टाकला. या घरात सोनू घेंबुड हा मोबाइल फोनवर बोलत होता. त्याच्यासमोर टीव्ही चालू होता. तो दिल्लीविरुद्ध हैदराबाद क्रिकेट सामना पाहत होता. छाप्यात पोलिसांनी एक सॅमसंग कंपनीचा मोबाइल, दोन सीमकार्ड, टीव्ही, सेटटॉप बॉक्स असे साहित्य जप्त केले आहे. आरोपीच्या मोबाइलमध्ये १८ जणांचे कॉल रेकॉर्डिंग आढळून आले. त्यात स्वप्नील पर्वते याचे दोन कॉल आढळले. आयपीएल सामन्यावर नगर शहरातून सट्टा खेळणाऱ्या लोकांकडून सट्टा घेऊन तो पर्वते याच्याकडे सट्टा लावतो, अशी कबुली आरोपी घेंबुड याने पोलिसांकडून दिली. त्यानंतर पर्वते याचा पोलिसांनी शोध घेतला. परंतु तो फरार झाला आहे.