‘आरोपींना मी हटकले होते’

नगर:गावातील व्यक्ती व मी कुळधरण ते कोपर्डी रस्त्यावरील पुलावर बसलो होतो. त्यावेळी आरोपी जितेंद्र शिंदे व त्याचे दोन साथीदार मोटारसायलकवरून ये-जा करत होते. त्यांना हटकले असता त्यांनी घराची चावी हरवली असून, ती सापडत नसल्याचे सांगितले, अशी साक्ष गावातील एका व्यक्तीने बुधवारी नोंदविली आहे.

कोपर्डी खटल्याची सुनावणी जिल्हा न्यायाधीश सुवर्णा केवले यांच्यासमोर सुरू आहे. बुधवारी आरोपी जितेंद्र शिंदे हा कामाला असलेल्या विटभट्टीचा मालक, या आरोपींना फिरताना पाहणाऱ्या व्यक्तीची साक्ष विशेष सरकारी वकिल अॅड. उज्ज्वल निकम यांनी नोंदविली. तर उलट तपासणी घेण्यात आली.

आरोपी शिंदे काम करत असलेल्या वीटभट्टी मालकाने शिंदे याने मोटारसायकल घेण्यासाठी चाळीस हजार रुपयांची उचल घेतली असल्याचे साक्षीत सांगितले. तर मुलीच्या मृत्यूचा पंचनामाच्या वेळी उपस्थित असलेल्या महिला पंचाची साक्ष नोंदविण्यात आली. तिने मुलीच्या अंगावर जखमा होत्या. तिचा गळ्यावर काळे निळे पट्टे होते, अशी साक्ष नोंदविली.

आज सुनावणी नाही

जिल्हा परिषद व पंचायत समितीच्या निवडणुका असल्यामुळे न्यायालयाला गुरुवारी सुट्टी आहे. त्यामुळे गुरुवारी सुनावणी स्थगित ठेवण्यात आली असून, शुक्रवारी नियमितपणे सुनावणी होणार आहे.