kopardi case: आरोपींवर हल्ला करणारे चौघे दोषी

नगरः कोपर्डी खटल्याच्या सुनावणीनंतर जिल्हा न्यायालयाच्या आवारात आरोपीला जीवे मारण्याचा प्रयत्न केल्याप्रकरणी शिवबा संघटनेशी संबंधीत चौघांना दोषी ठरविण्यात आलं असून त्यांना शिक्षा ठोठावली जाणार आहे. या हल्ल्यानंतर चारही आरोपींना अटक करण्यात आली होती, मात्र जामीन मिळू न शकल्यानं त्यांना तुरुंगातच ठेवण्यात आले होते.

अमोल सुखदेव खुणे, बाबुराव वामन वाळेकर, गणेश परमेश्वर खुणे, राजेंद्र बाळासाहेब जराड-पाटील अशी या आरोपींची नावे असून हे सर्वजण जालना जिल्ह्यातील रहिवासी आहेत. १ एप्रिल २०१७ रोजी कोपर्डी खटल्यातील आरोपी जितेंद्र शिंदे, नितीन भैलुमे आणि संतोष भवाळ या तीन आरोपींना सुनावणीनंतर कारागृहात नेण्यात येत असताना अमोल खुणे, गणेश खुणे, वाळेकर आणि जराड-पाटील यांनी आरोपींवर हल्ला केला होता. त्यामुळे पोलिसांनी या चारही हल्लेखोरांना ताब्यात घेण्याचा प्रयत्न केला असता त्यांनी पोलिसांवरही हल्ला चढवला होता. या हल्ल्यात पोलीस कर्मचारी रवींद्र भास्कर टकले जखमी झाले होते. मात्र पोलिसांनी या चारही जणांना अटक करून त्यांना तुरुंगात डांबले. त्यांच्याविरोधात सरकारी कामात अडथळा आणणे आणि जीवे मारण्याचा गुन्हा दाखल करण्यात आला होता. या चौघांविरोधात जिल्हा व सत्र न्यायालयात आरोपपत्रही दाखल करण्यात आले होते.

आज या प्रकरणावर सुनावणी झाली. यावेळी पोलीस कर्मचाऱ्यांसह सात जणांनी दिलेली साक्ष महत्त्वाची ठरली. तसेच सीसीटीव्ही कॅमेऱ्यातही ही घटना कैद झाल्याने हा पुरावाही या खटल्यात अत्यंत महत्त्वाचा ठरला. त्यामुळे या चारही आरोपींना न्यायालयाने दोषी ठरवले. सरकारी पक्षातर्फे अॅड. मंगेश दिवाणे यांनी बाजू मांडली.