कोपर्डी खटल्याची सुनावणी आठ रोजी

म. टा. प्रतिनिधी, नगर
कोपर्डी खटल्यात तिसऱ्या आरोपीचा अंतिम युक्तिवाद बुधवारी अपूर्ण राहिला असून, पुढच्या सुनावणीत हा युक्तिवाद पुढे सुरू राहिल. पुढील सुनावणी ८ व ९ नोव्हेंबरला होणार आहे. त्यामुळे या खटल्याचा निकाल या महिन्याच्या अखेर लागण्याची शक्यता आहे. जिल्हा व सत्र न्यायाधीश सुवर्णा केवले यांच्यासमोर या खटल्याची सुनावणी सुरू आहे.
आरोपी संतोष भवाळकडून अॅड. विजयालक्ष्मी खोपडे यांनी बुधवारी युक्तिवाद पूर्ण केला आहे. आरोपींच्या अटक पंचनाम्यावर वेळ नोंदविण्यात आलेली नाही. तर सरकार पक्षाने एक साक्षीदार ऐनवेळी घेऊन त्रुटी भरून काढण्याचा प्रयत्न केला आहे. आरोपीच्या वकिलांमुळे उशीर झाला असा आरोप सरकार पक्षाकडून करण्यात येत आहे. हा आरोप चुकीचा असून, कायदेशीर प्रक्रिया पार पाडणे याला उशीर म्हणता येणार नाही. हा खटला परिस्थितीजन्य पुराव्यावर आधारित असल्याचे सरकारी पक्ष युक्तिवादात सांगत असले तरी दिल्लीतील आरुषी तलवार हत्याकांड खटला परिस्थितीजन्य पुराव्यावर आधारित होता. हा पुरावा न्यायालयाने ग्राह्य न धरल्याने आरुषी हत्याकांडातील आरोपींना सोडून देण्यात आल्याचा दाखला ही युक्तिवादात अॅड. खोपडे यांनी केला. आरोपी नितीन भैलूमे हा जितेंद्र शिंदेचा नातेवाइक असल्याने त्याला अटक करण्यात आली असून, या गुन्ह्याशी त्याचा थेट संबंध असल्याचा पुरावा ही सरकारी पक्ष देऊ न शकल्याने या आरोपीला अडकविण्यात आले असल्याचा युक्तिवाद अॅड. प्रकाश आहेर यांनी केला. तर या गुन्ह्यातील फिर्यादी व आरोपीला पाहणारा एक साक्षीदार या दोघांविरुद्ध कर्जत पोलिस स्टेशनला गुन्हे दाखल असून, गुन्ह्याची पार्श्वभूमी असलेल्यांची साक्ष न्यायालयाने ग्राह्य धरू नये, असा युक्तिवाद आहेर यांनी केला.