कोपर्डी घटनेचा तपास; पोलिसांना प्रशंसापत्र

म. टा. प्रतिनिधी, नगर

राज्यभर गाजलेल्या तालुक्यातील कोपर्डी खटल्यात वेगात तपास करून आरोपींना शिक्षा झाल्याबद्दल मुख्यमंत्री देवेंद्र फडणवीस यांनी तपास पथकातील पोलिस अधिकारी व कर्मचारी यांची प्रशंसा केली असून, त्यांना प्रशंसापत्र दिले आहे. या कामगिरीमुळे महाराष्ट्र पोलिस दलाचे नाव उंचावले आहे, असे या पत्रात म्हटले आहे.

कोपर्डी खटल्यात मागील महिन्यात निकाल लागून तिघा आरोपींना फाशीची शिक्षा झाली आहे. हा गुन्हा घडल्यानंतर तत्कालीन पोलिस अधीक्षक सौरभ त्रिपाठी यांच्या मार्गदर्शनाखाली तत्कालीन स्थानिक गुन्हे शाखेचे पोलिस निरीक्षक शशिराज पोटोळे, सहायक पोलिस निरीक्षक डॉ. शरद गोर्डे, पोलिस कर्मचारी विष्णू घोडेचोर, सूरज वाबळे यांच्या पथकाने वेगाने तपास केला होता. तर आरोपींविरुद्ध आरोपपत्र तयार करताना त्रुटी राहू नयेत म्हणून काळजी घेतली. या खटल्यात महत्त्वपूर्ण काम केल्याबद्दल मुख्यमंत्री फडणवीस यांनी या तिघांनाही स्वतंत्र प्रशंसापत्र दिले आहे. जिल्ह्यातील कर्जत पोलिस ठाण्यांतर्गत कोपर्डी येथे घडलेल्या माणुसकीला काळीमा फासणाऱ्या घटनेत सर्व आरोपींना कठोर शिक्षा झाली. तपासात आपली महत्त्वपूर्ण भूमिका होती. या गुन्ह्यात केलेल्या कौशल्यपूर्ण व वेगवान तपासाबद्दल अभिनंदन करतो. या पुढेही आपणाकडून अशीच गौरवास्पद कामगिरी होईल आणि त्यामुळे महाराष्ट्र पोलिस दलाचे नाव उंचावले जाईल, अशी खात्री आहे, असे मुख्यमंत्र्यांनी पत्रात म्हटले आहे.