कोपर्डी खटला: २९ नोव्हेंबर रोजी फैसला

मटा ऑनलाइन वृत्त । नगर

महाराष्ट्रासह संपूर्ण देशाला हादरवून सोडणाऱ्या कोपर्डी बलात्कार आणि खून खटल्यातील आरोपी संतोष भवाळ, जितेंद्र शिंदे आणि नितीन भैलूमे या तीनही नराधमांच्या शिक्षेवरील युक्तिवाद आज संपला असून येत्या २९ नोव्हेंबर रोजी या आरोपींना शिक्षा सुनावली जाणार असल्याचं जिल्हा आणि सत्र न्यायालयाने स्पष्ट केलं. त्यामुळे या नराधमांना फाशी होणार की जन्मठेप याकडे संपूर्ण देशाचं लक्ष लागलं आहे.

कोपर्डी बलात्कार आणि खून खटल्यातील आरोपी जितेंद्र शिंदे, संतोष भवाळ आणि नितीन भैलूमे या तिघांविरुद्ध कट रचून बलात्कार व खून करणे या कलमानुसार आरोप सिद्ध झाल्यानंतर त्यांना शनिवारी दोषी ठरविण्यात आलं होतं. आज संतोष भवाळच्या खटल्यावर जिल्हा व सत्र न्यायालयाच्या न्यायाधीश सुवर्णा केवले यांच्यासमोर युक्तिवाद झाला. आज सकाळी न्यायालय सुरू झाल्यानंतर पावणे बारा वाजेपर्यंत भवाळचे वकील बाळासाहेब खोपडे यांनी युक्तिवाद केला. दोन तास चाललेल्या या युक्तिवादानंतर सरकारी वकील उज्जवल निकम यांनी जोरदार युक्तिवाद करत आरोपींना फाशीची शिक्षा देण्याची मागणी लावून धरली.

'रेअरेस्ट ऑफ रेअर' असं काय घडलं?

बचाव पक्षाचे वकील बाळासाहेब खोपडे यांनी युक्तिवाद करताना ही घटना दुर्देवी असल्याचं सांगितलं. घटना दुर्देवी आहे, मात्र प्रत्येकाला बचावाचा, अधिकार आहे. त्यामुळे शिक्षेच्या सुनावणीवर कोणतासाही सामाजित दबाव नसावा, असं खोपडे म्हणाले. भवाळनं गुन्हा केलेला नाही, तरीही पुरावा आणून आरोपी दोषी ठरवला गेला. शिवाय घटनेवेळी २ आणि ३ क्रमांकाच्या आरोपीला कुणीही घटनास्थळावरुन पळून जाताना पाहिलेलं नाही, म्हणून संतोष भवाळवर ३०२ कलमाची शिक्षा लागू होत नाही, असल्याचा दावाही त्यांनी केला.

या प्रकरणी 'रेअरेस्ट ऑफ रेअर' असं यात काय घडलं?, असं सांगतानाच दिसला फिरला म्हणून कट करुन हत्या असं होत नाही. शिक्षा दिली तर समाजात ऐकोपा होईल का, तसं असेल तर मी फाशी मागेन. फाशीसाठी पुरावा नाही, असं त्यांनी सांगितलं.