कोपर्डी कौर्य : पुढील आठवड्यात दोषारोपपत्र

नगर : कोपर्डी (ता. कर्जत) येथे अल्पवयीन मुलीवर अत्याचार व हत्या प्रकरणाचे दोषारोपपत्र सप्टेंबरच्या पहिल्या आठवड्यात दाखल होण्याची शक्यता आहे. याबाबत पोलिसांची तपास पूर्ण झाला असून आरोपींच्या एका मानसशास्त्रीय चाचणीचा अहवाल एक ते दोन दिवसात मिळण्याची शक्यता असून त्यानंतर दोषारोप दाखल करण्यात येणार असल्याची माहिती तपास अधिकाऱ्यांनी दिली.

कोपर्डी प्रकरणातील आरोपींच्या विरोधात आणखी काही पुरावे आणि आरोपींचा गुन्ह्यातील सहभाग नेमकेपणाने स्पष्ट व्हावा, यासाठी आरोपींच्या मुंबई येथील सीबीआयच्या लॅबमध्ये काही मानसशास्त्रीय चाचण्या घेण्यात आल्या. त्यापैकी केवळ एका चाचणीचा अहवाल पोलिसांकडे येणे बाकी आहे. हा अहवाल एक ते दोन दिवसांमध्ये मिळण्याची शक्यता असून त्यानंतर दोषारोपपत्र दाखल करण्याच्या प्रक्रियेला वेग येईल. याबाबत ‘मटा’शी बोलताना तपास अधिकारी पोलिस निरीक्षक शशिराज पाटोळे यांनी सांगितले की, ‘कोपर्डी प्रकरणाचा तपास हा अंतिम टप्प्यात आहे. दोषारोपपत्र दाखल करण्यासाठी आवश्यक कागदपत्रे जमा करण्यात आली आहे. त्यामुळे पुढील आठवड्यात या प्रकरणाचे दोषारोपपत्र दाखल होण्याची शक्यता आहे.’

हा खटला फास्ट ट्रॅक कोर्टात चालविण्याची आणि यामध्ये सरकारी वकील म्हणून उज्ज्वल निकम यांची नियुक्ती करण्याची घोषणा पूर्वीच झाली आहे. मात्र, त्यासंबंधीचे आदेश अद्याप येथे प्राप्त झालेले नाहीत. दोषारोपपत्र दाखल झाल्यानंतर यासंबंधी आदेश येण्याची शक्यता आहे. बालकांचे लैंगिक शोषण विरोधी कायद्यातील कलमे या खटल्यात लावण्यात आलेली असल्याने याचे कामकाज विशेष न्यायालयात चालणार आहे. पोलिसांचा तपास पूर्ण झाला असून सध्या केवळ कागदपत्रांच्या जुळावाजुळवीचे काम सुरू आहे. वैद्यकीय अहवाल पोलिसांना प्राप्त झाले असले तरी त्यासंबंधी अधिक तपशील देता येणार नसल्याचे पोलिसांनी सांगितले. मुख्य आरोपीचे वकीलपत्र अद्याप कोणीही घेतलेले नाही. मात्र, यातील तिसऱ्या आरोपीच्यावतीने कर्जत तालुक्यातीलच एका वकिलाने वकीलपत्र दाखल केलेले आहे.