कोपर्डीत 'रेअरेस्ट ऑफ रेअर' काय घडलं?

मटा ऑनलाइन वृत्त । नगर

महाराष्ट्राला हादरवून सोडणाऱ्या कोपर्डी बलात्कार आणि खून खटल्यातील आरोपी संतोष भवाळच्या शिक्षेवर आज जिल्हा व सत्र न्यायालयात युक्तिवाद झाला. यावेळी भवाळचे वकील बाळासाहेब खोपडे यांनी भवाळला या खटल्यात गोवण्यात आल्याचं सांगतानाच या खटल्यात 'रेअरेस्ट ऑफ रेअर' असं काय घडलं? असा असा सवाल केला.

कोपर्डी बलात्कार आणि खून खटल्यातील आरोपी जितेंद्र शिंदे, संतोष भोवळ आणि नितीन भैलूमे या तिघांना शनिवारी दोषी ठरविण्यात आलं होतं. यातील दोघांच्या शिक्षेवर काल युक्तिवाद करण्यात आला होता. आज भवाळच्या खटल्यावर युक्तिवाद होता. त्यानंतर निकाल लागणार असल्यानं संपूर्ण देशाचं लक्ष या खटल्याकडे लागलं होतं. आज सकाळी न्यायालय सुरू झाल्यानंतर पावणे बारा वाजेपर्यंत भवाळचे वकील बाळासाहेब खोपडे यांनी युक्तिवाद केला. त्यानंतर सरकारी वकील उज्जवल निकम यांनी जोरदार युक्तिवाद करत आरोपींना फाशीची शिक्षा देण्याची मागणी लावून धरली.

बचाव पक्षाचे वकील बाळासाहेब खोपडे यांनी युक्तिवाद करताना ही घटना दुर्देवी असल्याचं सांगितलं. घटना दुर्देवी आहे, मात्र प्रत्येकाला बचावाचा अधिकार आहे. त्यामुळे शिक्षेच्या सुनावणीवर कोणताही सामाजिक दबाव नसावा, असं खोपडे म्हणाले. संतोष भवाळनं गुन्हा केलेला नाही, तरीही पुरावा आणून आरोपी दोषी ठरवला गेला. शिवाय घटनेवेळी २ आणि ३ क्रमांकाच्या आरोपीला कुणीही घटनास्थळावरुन पळून जाताना पाहिलेलं नाही, म्हणून संतोष भवाळवर ३०२ कलमाची शिक्षा लागू होत नाही, असल्याचा दावाही त्यांनी केला.

या प्रकरणी 'रेअरेस्ट ऑफ रेअर' असं यात काय घडलं?, असं सांगतानाच दिसला फिरला म्हणून कट करून हत्या असं होत नाही. शिक्षा दिली तर समाजात ऐकोपा होईल का? तसं असेल तर मी फाशी मागेन. फाशीसाठी पुरावा नाही, असं त्यांनी सांगितलं.