लोगो - केडगाव दुहेरी हत्याकांड
.......
गिऱ्हे व मोकळेने नाकारला गुन्ह्यातील सहभाग
म. टा. प्रतिनिधी, नगर
केडगाव दुहेरी हत्याकांड प्रकरणी आता काँग्रेसचा केडगाव येथे नुकताच निवडून आलेला नगरसेवक विशाल कोतकर व त्याचा सहकारी रवी खोलम हे पोलिसांच्या रडारवर आहेत. हे दोघे सापडल्यानंतरच गुन्ह्याची उकल होण्याची शक्यता असून त्यादृष्टीने पोलिसांनी तपास सुरू केला आहे. दरम्यान, शुक्रवारी रात्री या गुन्ह्यामध्ये अटक करण्यात आलेले आरोपी संदीप बाळासाहेब गिऱ्हे व महावीर रमेश मोकळे या दोघांनी केडगाव दुहेरी हत्याकांडाशी आपला काहीही संबंध नसल्याचे प्राथमिक चौकशीत पोलिसांना सांगितले असल्याची माहिती मिळाली आहे.
आरोपी संदीप राजेंद्र गुंजाळ याने स्वतः संजय कोतकर यांच्यावर तर वसंत ठुबे यांच्यावर संदीप गिऱ्हे याने गोळ्या झाडल्याची माहिती पोलिसांना दिली होती. यावेळी महावीर मोकळे व आणखी एकजण आमच्यासोबत असल्याचेही गुंजाळ याने पोलिसांना सांगितले होते. त्यानुसार तपास करीत पोलिसांनी संदीप गिऱ्हे व महावीर मोकळे या आरोपींना पुणे जिल्ह्यातून अटक केली. या दोघांकडे प्राथमिक चौकशी केली असता त्यांनी मात्र या हत्याकांडाशी आपला काहीही संबंध नसल्याचे पोलिसांना सांगितले. गर्दी दिसल्यामुळे तेथे गेलो होतो, परंतु आमचा हत्याकांडाशी संबंध नसल्याचे त्यांनी पोलिसांसमोर स्पष्ट केल्याची माहिती मिळाली आहे. तर दुसरीकडे चौकशीच्या वेळी रोज वेगवेगळी माहिती आरोपी गुंजाळ देत असल्यामुळे त्याने दिलेल्या माहितीवर कितपत विश्वास ठेवायचा, असा प्रश्नही पोलिसांसमोर आहे. त्यामुळेच या गुन्ह्याची उकल करण्यासाठी आता पोलिसांनी नगरसेवक विशाल कोतकर व रवी खोलम या दोघांचा शोध सुरू केला आहे. राजकीय वादातून हे हत्याकांड झाले असल्याचे सध्याच्या पुराव्यावरून दिसत असले तरी कोतकर व खोलम हे दोघे सापडल्यानंतर हत्येमागील नेमके कारण, त्यामध्ये सहभागी असणारे आरोपी, यांचा उलगडा होईल, असा अंदाज पोलिसांना आहे.
'सीसीटीव्ही'चे फुटेजच नाही
केडगाव हत्याकांड हे राजकीय वादातून झाले असल्याचे आतापर्यंतच्या तपासातून समोर आले आहे. त्यातच मनपा पोटनिवडणुकीत विजयी झालेला उमेदवार विशाल कोतकर हा विजयी झाल्यानंतर केडगावच्या नेप्तीरोडवरील भानुदास कोतकर यांच्या घरी व नगरच्या माळीवाडा परिसरातील आयुर्वेद महाविद्यालयात गेला असल्याची माहिती पोलिसांना मिळाली होती. त्यानुसार या दोन्ही ठिकाणाच्या 'सीसीटीव्ही'मधून काही पुरावा मिळतो का, याची तपासणी करण्यासाठी पोलिस येथे गेले होते. प्रत्यक्षात मात्र येथे 'सीसीटीव्ही' कॅमेरे आढळले असले तरी कॅमेऱ्यांचे रेकॉर्डिंग जतन करणारा 'डीव्हीआर' तेथे आढळला नाही. विशेष तपास पथकातील अधिकाऱ्यांनी याला दुजोरा दिला आहे. त्यामुळे घटनेनंतर येथील 'डीव्हीआर' गायब करण्यात आला काय, किंवा येथील 'सीसीटीव्ही' अनेक दिवसांपासून बंदच होते का, असा प्रश्न यानिमित्ताने निर्माण झाला आहे. त्यादृष्टीनेही पोलिसांनी चौकशी सुरू केली आहे.
दहाव्यामुळे बंदोबस्त
केडगाव दुहेरी हत्याकांडातील संजय कोतकर व वसंत ठुबे या शिवसेना कार्यकर्त्यांचा दहावा सोमवारी (१६ एप्रिल) सकाळी ९ वाजता केडगाव येथील अमरधाममध्ये होणार आहे. या वेळी गर्दी होणार असल्याने पोलिसांनी बंदोबस्त नियोजन केले आहे. सार्वजनिक बांधकाम मंत्री एकनाथ शिंदे, पर्यावरण मंत्री रामदास कदम तसेच शिवसेनेच्या मुंबईतील नेत्या विशाखा राऊत, किशोरी पेडणेकर व अन्य पदाधिकारी यावेळी उपस्थित राहणार आहेत. त्यामुळे पोलिसांनीही आवश्यक खबरदारी घेऊन काही अनुचित प्रकार घडू नये म्हणून येथील बंदोबस्ताचे नियोजन केले आहे.