निवडणूक विभाग प्रमुखपदी
कोतकर यांची नियुक्ती
म. टा. प्रतिनिधी, नगर
महापालिकेच्या निवडणूक कामासाठी अधिकारी नियुक्तीची प्रक्रिया प्रशासनाने सुरू केली आहे. सांख्यिकी सहायक आर. बी. कोतकर यांना निवडणूक विभाग प्रमुखपदी तसेच नगरसचिव कार्यालयातील एन. के. देशमुख यांना संगणक चालक म्हणून नियुक्ती दिली आहे. निवडणुकीसंदर्भातील सर्वप्रकारच्या प्रसिद्धीची जबाबदारी प्रसिद्धी अधिकारी मिलिंद वैद्य यांच्यावर असणार आहे. राज्य निवडणूक आयोगाकडून येणारे आदेश व सूचनांची माहिती मनपा आयुक्त, उपायुक्त व निवडणुकीशी संबंधित अधिकाऱ्यांना देण्यासाठी नोडल ऑफिसर म्हणूनही त्यांच्यावर अतिरिक्त जबाबदारी आहे.
मनपा निवडणुकीचे कामकाज मनपा प्रशासनाद्वारे आता जोरात हाती घेण्यात आले आहे. प्रारुप प्रभाग रचना अधिसूचना राजपत्रात प्रसिद्ध झाल्यानंतर यावर हरकती येण्यास सुरुवात झाली आहे. या हरकतींवरील सुनावणीनंतर व अंतिम प्रभाग रचना झाल्यावर प्रारुप मतदार यादी तयार केली जाणार आहे. त्यानंतर मु्ख्य निवडणूक कार्यक्रम जाहीर होणार आहे. या प्रक्रियेच्या अनुषंगाने आवश्यक असलेल्या कामांच्या नियोजनासाठी निवडणूक विभाग प्रमुख म्हणून आर. बी. कोतकर व त्यांना सहायक संगणक चालक म्हणून एन. के. देशमुख यांची नियुक्ती केली गेली आहे. याशिवाय नगर सचिव-उपायुक्त, सर्व प्रभाग अधिकारी, नगर रचना विभागाचे अधिकारी व कर्मचारी, शहर अभियंता, विद्युत विभाग प्रमुख, मनपातील शिपाई मंडळींचा प्रमुख हवालदार आदींसह अन्य अधिकाऱ्यांनाही विविध कामांच्या जबाबदाऱ्या दिल्या गेल्या आहेत.
--
...अन्यथा कारवाई
मनपा निवडणुकीच्या कामासाठी नियुक्त करण्यात आलेल्या अधिकारी व कर्मचाऱ्यांना गोपनीयता बाळगून काम करण्यास सांगण्यात आले आहे. 'तुम्ही सर्वजण मनपाचे कर्मचारी असला तरी आता तुमच्या सेवा राज्य निवडणूक आयोगाकडे निवडणुकीची प्रक्रिया संपेपर्यंत वर्ग झाल्या आहेत. त्यामुळे निवडणूक कामात प्रत्येकाने गोपनीयता बाळगावी व नेमून दिलेली कामे विहीत वेळेत पूर्ण करावीत. नाही तर आपणावर निवडणूक आयोगाच्या कारवाईस सामोरे जावे लागेल', असेही प्रशासनाद्वारे स्पष्ट करण्यात आले आहे.