​ ‘कायनेटिक’चा पुन्हा लिलाव

म. टा. प्रतिनिधी, नगर

नगरच्या अरणगाव रोडवरील कायनेटिक कंपनीकडील ३ कोटी ३३ लाखांच्या मालमत्ता कर वसुलीसाठी महापालिकेने या कंपनीच्या सील मालमत्तेचा पुन्हा लिलाव जाहीर केला आहे. येत्या ६ डिसेंबरला दुपारी साडेबारा वाजता हा लिलाव केला जाणार आहे. कायनेटिक कंपनीसह केडगावच्या पाटील कॉलनीतील राजमोहंमद पटेल यांच्या मालमत्तेचाही या दिवशी लिलाव केला जाणार आहे.

अरणगाव रोडवरील कुंदनमल शोभाचंद फिरोदिया कायनेटिक इंजिनीअरिंग लिमिटेड कंपनीसह सहा मालमत्तांचा लिलाव सुमारे दोन महिन्यांपूर्वी मनपाने पुकारला होता. त्याआधी या कंपनीचे प्रशासकीय कार्यालय महापालिकेने सील केले होते. लिलाव पुकारल्यानंतर बाकी पाच मालमत्ताधारकांनी थकित मालमत्ता करभरणा केला. मात्र, कायनेटिक कंपनीने न्यायालयात धाव घेऊन मनपाच्या कारवाईला आक्षेप घेतला होता. मालमत्ता कराच्या वादाबाबत कंपनीने न्यायालयात खटला दाखल केला असल्याने कार्यालय सील करून त्याचा लिलाव पुकारणे बेकायदा असल्याचे त्यांचे म्हणणे होते. मात्र, उच्च न्यायालयाने नगरच्या न्यायालयात सुरू असलेल्या या दाव्याची तातडीने सुनावणी घेऊन निकाल देण्याचे आदेश दिले होते. त्यानुसार ही सुनावणी होऊन मनपाच्या बाजूने निकाल लागल्याने आता महापालिकेने पुन्हा कायनेटिकच्या सील केलेल्या मालमत्तेचा लिलाव पुकारला आहे. या कंपनीकडे ३ कोटी ३३ लाख ४८ हजार ५७७ रुपयांची थकबाकी आहे. तसेच केडगावच्या राजमोहंमद पटेल यांच्याकडे २ लाख १२ हजार ६२२ रुपयांची मालमत्ता कर थकबाकी आहे. या दोन्ही मालमत्तांचा लिलाव ६ डिसेंबरला केला जाणार आहे. इच्छुकांनी महापालिकेत एक हजार रुपये डिपॉझिट भरून लिलावात भाग घेण्याचे आवाहन उपायुक्त राजेंद्र चव्हाण यांनी केले आहे.