कापड बाजारात महिला स्वच्छतागृह

म. टा. प्रतिनिधी, नगर

कापड बाजारासह डाळमंडई, नवीपेठ, घासगल्ली अशा बाजारपेठेच्या विविध भागांत कपडे वा अन्य साहित्याच्या खरेदीस येणाऱ्या महिलांसाठी स्वतंत्र स्वच्छतागृहाची सुविधा गंज बाजारात केली जाणार आहे. महापौर सुरेखा कदम यांनी यासाठी पुढाकार घेतला असून, यासाठी रोटरी क्लब नगर सेंट्रलने

मदत देऊ केली आहे. येत्या महिनाभरात हे स्वच्छतागृह सुरू करण्याचे प्रयत्न असणार आहेत.

गंज बाजारातील मनपाच्या जुन्या फ्रुट मार्केटमधील दोन गाळे व त्यापाठीमागील जागा महापालिकेने मागील मे महिन्यात स्वतःच्या ताब्यात घेतली आहे. या जागेतील बेकायदा व्यावसायिकांना हटवले गेले आहे. या जागेत महिलांसाठी स्वतंत्र स्वच्छतागृह करण्याचे नियोजन आहे. कापड बाजार, गंज बाजार, आडते बाजार, सराफ बाजार, घासगल्ली, जुना कापड बाजार, नवी पेठ आदी भागात विविध साहित्य खरेदीसाठी येणाऱ्या महिलांसाठी हे स्वच्छतागृह उपयोगी ठरणार आहे.

रोटरी क्लब नगर सेंट्रलचे माजी अध्यक्ष उमेश रेखी यांनी केवळ महिलांसाठी असे स्वच्छतागृह कापड बाजारात उभारून देण्याची तयारी दाखवली होती. रोटरी सेंट्रलचे नंतरचे अध्यक्ष मनीष बोरा तसेच सध्याचे अध्यक्ष धीरज मुनोत व सचिव सागर शर्मा यांनी महापालिकेकडे यासाठी पाठपुरावा केला होता. त्यास आता यश येण्याची चिन्हे आहेत. मनपाने त्यांना आता परवानगी दिली आहे. सुमारे पाच ते सहा लाख रुपये खर्चून या जागेत रोटरी सेंट्रलद्वारे महिलांसाठी अद्ययावत सुविधायुक्त बंदिस्त स्वच्छतालय केले जाणार आहे. त्याची देखभाल दुरुस्ती, वीज बिल व अन्य खर्चाची जबाबदारी २५ वर्षांसाठी रोटरी सेंट्रलवरच टाकली गेली आहे; मात्र, या स्वच्छतागृहात नागरिकांकडून काही सेवाशुल्क आकारायचे असल्यास त्याबाबत महापालिकेची पूर्व परवानगी घ्यावी लागणार आहे.

महत्त्वाची गरज

नगरच्या कापड बाजारात नगर शहर व उपनगरांसह बाहेरगावचे नागरिकही कपडे व विविध साहित्य खरेदीस येतात. या परिसरात एकही स्वच्छतागृह नाही. पुरुषांसाठीची स्वच्छतागृहेही आजूबाजूच्या व्यावसायिकांना त्रास होतो म्हणून रात्रीतून पाडली गेली आहेत. परिणामी, केवळ स्वच्छतागृह नाही म्हणून कापड बाजार परिसरातील व्यवसायावरही परिणाम झाला आहे. शहराची बहुतांश आर्थिक उलाढाल असलेल्या या परिसरात किमान महिलांसाठी तरी स्वतंत्र स्वच्छतागृह आवश्यक आहे. त्याची गरज यानिमित्ताने पूर्ण होण्याची शक्यता आहे.

चौकट ः

वाहनतळ की स्वच्छतागृह?

गंज बाजारातील जुन्या मनपा फ्रुट मार्केटच्या जागेतील या नियोजित स्वच्छतागृहाला विरोध होण्याची शक्यता आहे. स्वच्छतागृहामुळे दुर्गंधी वा अन्य त्रास होणार असल्याच्या भीतीने परिसरातील व्यावसायिकांनी येथे वाहनतळ करण्याची मागणी केली आहे. अशा स्थितीत हे स्वच्छतागृह उभारण्याचे आव्हान मनपा सत्ताधारी व प्रशासनासमोर असणार आहे.