गिफ्ट फ्रॉडची वकिलाची तक्रार

म. टा. प्रतिनिधी, नगर

विदेशातील व्यक्तीशी चॅटिंग केल्यानंतर त्याने पाठविलेल्या वस्तू व पौंड सोडविण्यासाठी कस्टम ड्युटीच्या नावाखाली ३५ हजार रुपये भरण्यात आले. त्यानंतर आणखी पैसे मागण्यात येत होते. वस्तू मिळाली नाही, परंतु, हातातून पैसे गेल्याचा प्रकार नगरमघ्ये एका ३५ वर्षीय महिला वकिलाबाबत घडला आहे. नगरच्या सायबर पोलिस स्टेशनला वर्षभरात पहिलीच गिफ्ट फ्रॉडची तक्रार दाखल झाली आहे.

बनावट फेसबूक अकाउंट उघडून महिलांची बदनामी करणे, व्हाट्स अॅपवर अश्लील मेसेज टाकण्याच्या तक्रारी सायबर पोलिस स्टेशनला नियमित येत असतात. त्यात सायबर पोलिस स्टेशन तपास करून आरोपीला अटक करतात. नगर शहरातील एका महिला वकिलाची गिफ्ट फ्रॉड प्रकारची फसवणूक झाल्यानंतर तिने सायबर पोलिस स्टेशनला धाव घेऊन तक्रार दाखल केली आहे. या महिलेचा मोबाइलच्या व्हॉटस अॅप क्रमांकावर इंग्लंडमधून एका व्यक्तीचा मेसेज आला होता. माझी पत्नी मृत झाली असून, मला मुले नाहीत. मला तुमच्याबरोबर मैत्री करायची आहे, असा मेसेज महिेलेचा मोबाइलवर आला होता. या मेसेजकडे महिलेने काही दिवस दुर्लक्ष केले होते. परंतु, पुन्हा मेसेज करून चॅटिंग सुरू केले. तुला भेट वस्तू व सात हजार पौंड पाठवित असल्याचा मेसेज पाठवून वस्तू पाठविल्याची स्लिप संबंधित व्यक्तीने व्हॉटस अॅपवर टाकली होती. तसेच वस्तूचे फोटो टाकले होते. त्यात पर्स, घड्याळ, सोन्याचे दागिने अशा वस्तूचे फोटो होते.

या वस्तू व पौंड या दिल्ली विमानतळावर आल्याचा फोन महिलेला आला होता. वस्तू सोडविण्यासाठी कस्टम ड्युटीपोटी ३५ हजार रुपये भरण्यास सांगून दोन खाते क्रमांक देण्यात आले होते. हे पैसे भरल्यानंतर या वस्तू नगरला घरपोच होतील, असे सांगण्यात आले. एका खात्यावर वकील महिलेने १७ हजार ५०० रुपये भरले. ही माहिती या महिलने स्वतःच्या पतीला सांगितली होती. त्यानेही दुसऱ्या एका खात्यावर एटीएम ते एटीएम पैसे ट्रान्सफर केले. परंतु, हे पैसे भरल्यानंतर वस्तू मात्र मिळाल्या नाहीत.

चौकट ः

आणखी फसवणूक टळली

पैसे भरून वस्तू मिळाल्या नाहीत. पुन्हा फोन आला की कस्टम ड्युटी भरण्यासाठी उशीर झालेला आहे. तर पाठविलेल्या सात हजार पौंडसाठी आणखी ५२ हजार ५०० रुपया भरा, असा दिल्लीवरून कस्टम ड्युटीतून महिलेला फोन आला. परंतु, सातत्याने पैशाची मागणी होत असल्याने वकील महिलेला आपली फसवणूक झाल्याचे निदर्शनात आले. त्यानंतर महिलेने पैसे भरलेले खाते क्रमांक, वस्तूचे फोटो व इतर माहिती सायबर पोलिस स्टेशनला दिली आहे.

कोट ः

हा गिफ्ट फ्रॉडचा प्रकार आहे. विदेशातून वस्तू पाठविल्याचे सांगून महिलांकडून पैसे घेऊन फसवणूक केली जाते. मुंबई, पुणे येथे सातत्याने अशा फसवणुकी होतात. नगरमध्ये असा पहिलाच गुन्हा असून, या मागे नायझेरियन टोळ्या आहेत. या महिलेच्या तक्रारीनुसार तपास सुरू केला आहे.

- सुनील पवार, पोलिस निरीक्षक, सायबर पोलिस स्टेशन