म. टा. वृत्तसेवा, पाथर्डी सामुदायिक होळी पेटवून व भट्टीचा सण साजरा करत बुधवारी रात्री कानिफनाथांनी संजीवन समाधी घेतलेल्या श्री क्षेत्र मढी येथील यात्रेला सुरुवात करण्यात आली. होळी, रंगपंचमी व गुढीपाडवा या तीन टप्प्यात पार पडणाऱ्या मढी येथील यात्रेला बुधवारी सुरुवात करताना सामुदायिक होळी पेटविण्यात आली. राज्यात सर्वत्र होळीचा सण हुताशनी पोर्णिमेला साजरा करण्यात येत असला तरीही मढी येथे पंधरा दिवस आधीच सामुदायिक होळी पेटवून सण साजरा करतात. हुताशनी पोर्णिमेला कोणीही होळी पेटवित नाही. गावातील महिलांनी स्वहस्ते शेणापासून बनविलेल्या गोवऱ्या बुधवारी रात्री गडावर वाजतगाजत आणण्यात आल्या. या सर्व गोवऱ्या एकाच ठिकाणी जमा करून नंतर शेजआरती करण्यात आली व त्या नंतर ही सामुदायिक होळी कानिफनाथांचा जयघोष करत व पूजा अर्चा करत पेटविण्यात आली. या धार्मिक सोहळ्याला एक इतिहास असून पूर्वीच्या काळी मढी पंचक्रोशीतील भाविक डोंगरदऱ्यात फिरून चुनखडी गोळा करून आणायचे व ही चुनखडी मुख्य मंदिरावर पेटविलेल्या सामुदायिक होळीमध्ये भाजायचे. या नंतर भाजलेली चुनखडी बाहेर काढून एका हौदात टाकली जायची व त्या नंतर या चुनखडीचा चुना तयार करून तो नाथांच्या मंदिराला तसेच पायऱ्या व भिंतींना लावला जातो. सामुदायिक होळी पेटविल्यानंतर रात्रभर होळीचे रक्षण करण्याचे काम ग्रामस्थ करतात. ते करताना पारंपरिक कवने व गीते म्हणण्याचा कार्यक्रम केला जातो. बुधवारी होळी पेटविल्यानंतर ओंकार बाबासाहेब व्यवहारे या बालकलाकाराचे शिवचरित्रावर व्याख्यान ठेवण्यात आले तर त्यानंतर जळके खुर्द येथील अन्वरवली नाट्य मंडळाचे एक नाटकही ठेवण्यात आले होते. पेटविलेल्या होळीतील चुना गुरुवारी सकाळी काढून आता मंदिराला तो लावला जाणार असून हा विधी पार पडल्याने आता मढी यात्रेला सुरुवात झाल्याचे मानले जात आहे. देवस्थानचे अध्यक्ष शिवशंकर राजळे, विश्वस्त अण्णासाहेब मरकड, दत्तात्रय मरकड, मधुकर साळवे, सुधाकर मरकड, जिल्हा परिषदेचे उपमुख्य कार्यकारी अधिकारी कोल्हे उपस्थित होते. |
सामुदायिक होळीने मढी यात्रा सुरू
सामुदायिक होळी पेटवून व भट्टीचा सण साजरा करत बुधवारी रात्री कानिफनाथांनी संजीवन समाधी घेतलेल्या श्री क्षेत्र मढी येथील यात्रेला सुरुवात करण्यात आली.
Maharashtra Times 11 Mar 2016, 3:00 am