‘फुटबॉल मिशन’ उत्साहात

म. टा. प्रतिनिधी, नगर
दिवसातील काहीवेळ मैदानावर जाऊन खेळ खेळल्याने शरीरात एक उत्साह निर्माण होतो. शारीरिक व्यामासाठी प्रत्येकाने थोडा वेळ दिला पाहिजे. निरोगी आरोग्यासाठी हे मिशन हाती घेण्यात आले असून, अशा उपक्रमाच्या माध्यमातून खेळास चालना मिळते, असे प्रतिपादन पालकमंत्री राम शिंदे यांनी केले. ते ‘महाराष्ट्र फुटबॉल मिशन’ उद्घाटन प्रसंगी बोलत होते.
जागतिक फुटबॉल महासंघाची (फिफा) १७ वर्षाखालील खेळाडूंची फुटबॉल वर्ल्ड कप स्पर्धा ऑक्टोबर महिन्यात भारतात होत आहे. या स्पर्धेच्या पार्श्वभू्मीवर राज्यात फुटबॉल खेळाची आवड निर्माण व्हावी, तसेच अधिकाधिक मुलांनी फुटबॉल खेळण्यासाठी प्रवृत्त व्हावे, यासाठी जिल्ह्यात तब्बल २ हजार ८७६ फुटबॉलचे वाटप करण्यात आले आहे. या पार्श्वभूमीवर क्रीडा विभागाच्या वतीने वाडिया पार्क येथे ‘महाराष्ट्र फुटबॉल मिशन’ या कार्यक्रमाचे आयोजन करण्यात आले होते. या वेळी पालकमंत्री राम शिंदे, जिल्हाधिकारी अभय महाजन, पोलीस अधीक्षक रंजनकुमार शर्मा, महापौर सुरेखा कदम, जिल्हा क्रीडा अधिकारी उदय जोशी, लोकप्रतिनिधी, शिवछत्रपती पुरस्कार विजेते खेळाडू, राष्ट्रीय-आंतरराष्ट्रीय खेळाडू, सामाजिक व राजकीय कार्यकर्ते, विविध क्षेत्रातील नामवंत व्यक्ती यावेळी उपस्थित होते. याप्रसंगी पालकमंत्री राम शिंदे यांनी फुटबॉल खेळत मिशनचे उद्घाटन केले. यावेळी शहरातील विविध शाळा, कॉलेजमधील विद्यार्थ्यांनी वाडियापार्क येथील मैदानावर मोठी गर्दी केली होती. हजारोंच्या संख्येने विद्यार्थी, क्रीडाशिक्षक उपस्थित होते. शहरात गेल्या दोन दिवसापासून पावसाने हजेरी लावल्याने क्रिडा संकुल येथील मैदानावर चिखल झाला होता. परंतु चिखल असून देखील विद्यार्थ्यांनी फुटबॉल खेळत या मिशन मध्ये सहभाग दर्शविला.