नगरमधील आठ विद्यमान आमदार पिछाडीवर

अहमदनगरः राज्यातील उतर जिल्ह्यापेक्षा नगर जिल्ह्यातील निकालाचा कल वेगळा असून बारा मतदारसंघापैकी केवळ दोन जागांवर सत्ताधारी भाजपचे उमेदवार आघाडीवर आहेत. शिवसेनेचे तिन्ही उमेदवार मागे पडले असून राष्ट्रवादी काँग्रेसने आठ तर, काँग्रेसने दोन जागांवर आघाडी घेतली आहे. जिल्ह्यातील आठ विद्यमान आमदार पिछाडीवर आहेत.

मतमोजणीच्या निम्याहून अधिक फेऱ्या जाहीर झाल्या आहेत. त्यानुसार पालकमंत्री राम शिंदे, विधानसभेचे उपाध्यक्ष विजय औटी, आमदार मोनिका राजळे, स्नेहलता कोल्हे, शिवाजी कर्डिले, बाळासाहेब मुरकुटे, भाऊसाहेब कांबळे, वैभव पिचड हे विद्यमान आमदार पिछाडीवर आहेत.
भाजपमधून मंत्री राधाकृष्ण विखे व बबनराव पाचपुते हे दोघेच सध्या आघाडीवर आहेत. तर, शिवसेनेचे नगर शहर, पारनेर व श्रीरामपूर मतदारसंघातील तिन्ही उमेदवार पिछाडीवर आहेत. काँग्रेसचे प्रदेशाध्यक्ष बाळासाहेब थोरात व लहू कानडे दोघे आघाडीवर आहेत.

राष्ट्रवादी काँग्रेसने मात्र जोरदार मुसंडी मारली आहे. गेल्यावेळी राष्ट्रवादीचे तीन आमदार होते. या विधानसभा निवडणूकीत रोहित पवार, संग्राम जगताप, निलेश लंके, प्रताप ढाकणे, प्राजक्त तनपुरे, अशुतोष काळे, किरण लहामटे यांच्यासोबत राष्ट्रवादी पुरस्कृत शंकरराव गडाख आघाडीवर आहेत.