अ‍ॅपशहर

Leopard Shot Dead: बारा बळी घेणाऱ्या 'त्या' बिबट्याला अखेर टिपले; केळीच्या बागेत शिरला अन्...

Leopard Shot Dead नगर, सोलापूरसह चार जिल्ह्यांत अनेकांना आपलं भक्ष्य बनवणाऱ्या नरभक्षक बिबट्याला टिपण्यात अखेर यश आले आहे. सोलापुरातील करमाळा तालुक्यात या बिबट्याचा आज शूटर्सनी वेध घेतला.

Authored byविजयसिंह होलम | Edited byगजानन सावंत | महाराष्ट्र टाइम्स.कॉम 18 Dec 2020, 8:07 pm
अहमदनगर : अहमदनगर जिल्ह्यासह पाच जिल्ह्यांत १२ जणांचा बळी घेणाऱ्या बिबट्याला ठार मारण्यात वन विभागाला अखेर यश आले आहे. करमाळा तालुक्यातील मांगी येथे शार्प शूटरच्या गोळीबारात बिबट्याचा मृत्यू झाला आहे. नगर, औरंगाबाद, बीड आणि सोलापूर या चार जिल्ह्यांत गेले काही दिवस या बिबट्याचा उपद्रव होता. ही बाब लक्षात घेऊन नरभक्षक बिबट्याला ठार मारण्याचे आदेश देण्यात आले होते. त्यानंतर सातत्याने हा बिबट्या गुंगारा देत होता. हा लपंडाव अखेर संपला असून चारही जिल्ह्यांतील बिबट्याची दहशतही त्यासोबत संपली आहे. ( Karmala Leopard Latest News Update )
महाराष्ट्र टाइम्स.कॉम leopard
नरभक्षक बिबट्याची दहशत संपली


वाचा: ...आणि रोहित पवारांनी स्वत: हातात काठी घेतली!

नगर, बीड, सोलापूर जिल्ह्यांच्या सीमाभागात अनेकांचा बळी घेऊन दशहत पसविणारा हा बिबट्या आज सायंकाळी मारला गेला. करमाळा तालुक्यातील वांगी शिवारात पांडुरंग राखुंडे यांच्या केळीच्या बागेत वन विभागाचे शार्प शूटर चंद्रकात मंडलिक यांनी त्याला टिपले. गेल्या अनेक दिवसांपासून त्याला पकडण्याची मोहीम युद्धपातळीवर सुरू होती. नगर जिल्ह्यातील पाथर्डी, बीड जिल्ह्यातील आष्टी आणि सोलापूर जिल्ह्याती करमाळा तालुक्यात या बिबट्याचा उपद्रव सुरू होता. या भागात त्याने १२ जणांचे बळी घेतले होते. एकट्या करमाळा तालुक्यातच तीन बळी घेतले होते. पिंजरे लावूनही तो सापडत नव्हता. उलट माणसांवर आणि प्राण्यांवर त्याचे हल्ले सुरूच होते. त्यामुळे त्याला पकडण्याचा आणि नाहीच सापडला तर ठार करण्याचा आदेश मुख्य वनसंरक्षकांनी दिला होता.

वाचा: गोवारी आदिवासी नाहीत; सुप्रीम कोर्टाच्या निकालाने मोठा हादरा

वनसंरक्षकांच्या आदेशानुसार या चारही जिल्ह्यांत पथके कार्यरत करण्यात आली होती. शेवटच्या टप्प्यात या बिबट्याचा करमाळा तालुक्यात जास्त वावर आढळून आल्याने ही पथके तालुक्यात तळ ठोकून होती. त्याने अनेकदा पथकांना गुंगाराही दिला होता. अखेर शुक्रवारी सायंकाळी वन विभागाचे शार्प शूटर चंद्रकात मंडलिक यांनी या बिबट्याला ठार केले. पुणे व सोलापूर जिल्ह्यातील वन अधिकारीही सोबत होते. यामुळे आता शेतकरी, ग्रामस्थ आणि वन विभागाच्या कर्मचाऱ्यांनीही सुटकेचा नि:श्वास सोडला आहे.

वाचा: पडळकर कोणाचे चमचे आहेत?; मुश्रीफ यांचा रोख 'त्या' नेत्यावर

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज