यंदा महिनाभर उशीर; अवकाळीने कमी आवक
म. टा. प्रतिनिधी, नगर
फळांचा राजा आंबा नगरमध्ये दाखल झाला आहे. अर्थात यंदाच्या आंबा मोसमाला थोडी उशिराच सुरुवात झाली आहे. दरवर्षी फेब्रुवारीच्या पहिल्या आठवड्यात येणारा आंबा यंदा तब्बल महिनाभराने म्हणजे मार्च महिन्याच्या पहिल्या आठवड्यात नगरच्या बाजारात आला आहे. मागील वर्षीच्या नोव्हेंबर-डिसेंबरमधील अवकाळी पावसाने आंबा मोहर झडल्याने यंदा आवक कमी राहण्याची शक्यता आहे.
नगरला सध्या लालबाग, रत्नागिरी हापूस व देवगड हापूस आंब्यांचे आगमन झाले आहे. यंदा कोकण, रत्नागिरी, केरळ, चेन्नई, बंगळुरू येथे अवकाळी पाऊस झाल्याने आंबा पिकांचे नुकसान झाले आहे. परिणामी यंदा आवकही उशिरा सुरू झाली असून, आंबा महागलाही आहे. त्याचे सध्याचे भाव सर्वसामान्यांच्या आटोक्यातील नाहीत. सध्या लालबाग आंब्यांचा २ डझनाचा दर आठशे ते एक हजार रुपये तर हापूस आंब्यांची २ डझनाची पेटी १८०० ते २००० रुपयांना आहे, अशी माहिती आंब्यांचे येथील विक्रेते पप्पू आहुजा यांनी दिली. आंब्यांची आवक वाढल्यावर भाव कमी होतील, असा विश्वासही त्यांनी व्यक्त केला.
--