मुख्यमंत्र्यांचे शिष्टमंडळाला आश्वासन
म. टा. प्रतिनिधी, नगर
मराठा समाजाला १६ टक्के आरक्षण दिले असले तरी त्याची अंमलबजावणी आणि त्याच्याशी संबंधित अन्य मागण्या यांचा आढावा घेण्यासाठी जानेवारीच्या पहिल्या आठवड्यात अधिकाऱ्यांची बैठक घेतली जाईल, असे आश्वासन मुख्यमंत्री देवेंद्र फडणवीस यांनी मराठा क्रांती मोर्चाच्या शिष्टमंडळाला दिले.
मराठा क्रांती मोर्चा समन्वयकांच्या शिष्टमंडळाने मुंबईत मुख्यमंत्र्यांची भेट घेतली. त्या वेळी त्यांनी हे आश्वासन दिले. संजीव भोरपाटील, शांताराम कुंजीर, राजेंद्र कोंढरे, रघुनाथ चित्रे, माउली पवार, अंकुश कदम, वीरेंद्र पवार, धनंजय जोगदंड, सुधीर भोसले, अरविंद मोरे, विनोद साबळे, तेजस पवार, वैभव जाधव, इंद्रजीत निंबाळकर आदींचा या शिष्टमंडळात समावेश होता.
शिष्टमंडळाने या वेळी मराठा समाज आरक्षण आणि संबंधित विषयांवर चर्चा केली. आरक्षण कायद्याच्या कचाट्यात अडकू नये यासाठी राज्य व केंद्र सरकारने तातडीने पावले उचलून घटनात्मक व कायदेशीर संरक्षण द्यावे. यासाठी प्रसंगी घटना दुरुस्ती करावी. मराठा क्रांती मोर्चाच्या माध्यमातून करण्यात आलेल्या अन्य प्रलंबित मागण्या मागे पडता कामा नयेत, या बाबत सरकारने तातडीने पुढील कार्यवाही सुरू करावी, अशा मागण्या करण्यात आल्या.
कोपर्डी प्रकरणातील आरोपींवरील उच्च न्यायालयातील खटला गतिमान करावा, ॲट्रॉसिटी कायद्याचा गैरवापर रोखणे, मराठा वसतिगृह, अण्णासाहेब पाटील आर्थिक मागास विकास महामंडळ योजनेचा लाभ बँकांकडून होत असलेली अडवणूक, आरक्षणाच्या निर्णयानंतर महावितरण किंवा इतर ठिकाणी सुरू झालेल्या भरती प्रक्रियांमध्ये एसईबीसीच्या जागाच दर्शविलेल्या नाहीत, अशा अडचणीही या वेळी मांडण्यात आल्या.
या सर्व प्रश्नांबाबत जानेवारीच्या पहिल्या आठवड्यात बैठक घेतली जाईल, केंद्र सरकारच्या अखत्यारित येणाऱ्या मुद्द्यांसंबंधी शिफारशी केल्या जातील, असे आश्वासन मुख्यमंत्र्यांनी या वेळी दिले. मराठा क्रांती मोर्चाची पुढील बैठक सहा जानेवारीला सोलापूरला होणार असल्याचेही भोर यांनी सांगितले.