म. टा. प्रतिनिधी, नगर
महापालिकेचे जून २०२१ मध्ये निवडले जाणारे नवे महापौरपद अनुसूचित जातीच्या महिलेसाठी राखीव झाले आहे. महापालिकेत पाच नगरसेविका यासाठी पात्र आहेत. यात शिवसेनेच्या ३ तर राष्ट्रवादी व काँग्रेसच्या प्रत्येकी एका नगरसेविकेचा समावेश आहे. राज्यातील सत्ताकारणासह स्थानिक राजकीय समीकरणांवर दीड वर्षानंतरची ही निवड अवलंबून आहे.
महापालिकेतील सध्याचे महापौरपद खुल्या प्रवर्गासाठी आहे. आतापर्यंतची सात महापौरपदे खुले, ओबीसी पुरुष व खुले महिला अशी राखीव होती. ओबीसी महिला व अनुसूचित जाती खुले वा महिला अशी आरक्षणे नसल्याने यापैकी कोणीही महापौर झाले नाही. त्यामुळेच मुंबईत बुधवारी झालेल्या महापौरपद आरक्षणाकडे महापालिकेचे लक्ष लागले होते. अनुसूचित जातीच्या महिलेसाठी हे पद आरक्षित झाल्याने या पदासाठी पात्र असलेल्या पाच नगरसेविकांच्या समर्थकांनी आनंदोत्सव केला. शिवसेनेच्या रिता भाकरे (प्रभाग ७), रोहिणी शेंडगे (प्रभाग ८) व शांताबाई शिंदे (प्रभाग १६) तसेच राष्ट्रवादीच्या रूपाली पारगे (प्रभाग ११) व काँग्रेसच्या शीला चव्हाण (प्रभाग ९) या पाच महिला पात्र असल्याने यांच्यापैकीच एकीची पुढचा महापौर म्हणून निवड करावी लागणार आहे.
(संबंधित वृत्त पान...)
--