मंत्री राम शिंदे व राधाकृष्ण विखे यांची उपस्थिती
म. टा. प्रतिनिधी, नगर
जिल्हा व शहर जिल्हा भाजपची सदस्य नोंदणी मोहीम शनिवारपासून (६ जुलै) सुरू होणार आहे. येत्या ११ ऑगस्टपर्यंत ही मोहीम सुरू राहणार आहे. शहर व जिल्हा भाजपने दोन स्वतंत्र कार्यक्रम यासाठी नियोजित केले आहेत. जिल्हा भाजपचा कार्यक्रम शनिवारी दुपारी १ वाजता तुषार गार्डनमध्ये होणार आहेत. या कार्यक्रमास पालकमंत्री प्रा. राम शिंदे व गृहनिर्माणमंत्री राधाकृष्ण विखे उपस्थित राहणार आहेत.
डॉ. श्यामप्रसाद मुखर्जी जयंतीनिमित्त भाजपने देशभरात पक्ष सदस्य व नवीन मतदार नोंदणी अभियान हाती घेतले आहे. ६ जुलै ते ११ ऑगस्टदरम्यान ते राबविले जाणार आहे. या अभियानाच्या माध्यमातून भाजपच्या पक्षांतर्गत निवडणुका व पदाधिकारी निवडीची प्रक्रियाही सुरू झाली आहे. सदस्यता अभियानानंतर पक्षाचे प्राथमिक सदस्य निश्चित होणार आहेत. त्यानंतर यातून सक्रिय सदस्य नोंदणी होणार आहे. त्यानंतर पक्षाच्या स्थानिक समित्यांची रचना आणि मंडलाध्यक्ष, शहर जिल्हाध्यक्ष व जिल्हाध्यक्ष निवडीचे कार्यक्रम जाहीर होणार आहेत.
शहर जिल्हा भाजपचे सदस्य नोंदणी व नवीन मतदारनोंदणी अभियान शनिवारी सकाळी साडेनऊ वाजता सावेडीच्या प्रोफेसर कॉलनी चौकात सुरू होणार आहे. तर जिल्हा भाजपचा कार्यक्रम दुपारी १ वाजता तुषार गार्डनमध्ये होणार आहे. या वेळी प्रा. शिंदे व विखे या दोन मंत्र्यांसह खासदार डॉ. सुजय विखे, जिल्हाध्यक्ष प्रा. भानुदास बेरड, प्रदेश भाजपचे उपाध्यक्ष बाळासाहेब गावडे तसेच माजी खासदार दिलीप गांधी, आमदार शिवाजी कर्डिले, मोनिका राजळे, बाळासाहेब मुरकुटे, स्नेहलता कोल्हे, माजी आमदार बबनराव पाचपुते व चंद्रशेखर कदम, महापौर बाबासाहेब वाकळे, सदस्यता नोंदणी प्रमुख प्रसाद ढोकरीकर, श्याम पिंपळे आदींसह अन्य पदाधिकारी उपस्थित राहणार आहेत.