येत्या रविवारी बुलेट रॅलीसह स्पर्धात्मक उपक्रम
म. टा. प्रतिनिधी, नगर
जागतिक महिला दिन जसा उत्साहात साजरा होतो, तसा जागतिक पुरूष दिन उत्साहात साजरा करण्यासाठी नगरमधील काही महिला व युवतींनी पुढाकार घेतला आहे. फक्त पुरुषांसाठीच बुलेट रॅली, चांदबिबी महालावर स्लो बाइक रेसिंग व झुम्बा डान्ससारख्या उपक्रमांसह विशेष पुरूष दिन सेल्फी पॉइंटही केला जाणार आहे. येथील ट्रेककॅम्प ट्रेकिंग संस्था, आनंदम मनोविकास संस्था व बीयू संस्थेतील महिला व युवतींनी येत्या रविवारी (१७ नोव्हेंबर) याचे नियोजन केले आहे.
समाजव्यवस्थेत कर्ता पुरूष मानल्या जाणाऱ्या पुरुषालाही मानसन्मान मिळावा, त्याचीही स्वतःची सुख-दुःखे समाजासमोर जावीत, त्यालाही विविध विषयांवर व्यक्त होण्याची संधी मिळण्यासाठी ट्रेककॅम्प संस्थेचे विशाल लाहोटी, आनंदम मनोविकास संस्थेच्या शर्वरी मुळे यांच्यासह बीयू संस्थेच्या फिटनेस ट्रेनर स्वप्नाली जंबे यांनी या कार्य़क्रमाचे आयोजन केले आहे. येत्या १९ रोजी जगभरात पुरूष हक्क दिन साजरा होत असला, तरी त्याच्या दोन दिवस आधी हे विशेष कार्यक्रम येथे होणार आहेत.
रविवारी (१७ नोव्हेंबर) सकाळी सहा वाजता सावेडीच्या रॉयल एन्फिल्ड-कराचीवाला ऑटोमोबाइल शोरूमपासून पुरुषांची बुलेट रॅली निघणार असून, ती शहरभर फिरून चांदबिबी महालाकडे जाणार आहे. याच वेळी 'साद गर्भगिरीची' उपक्रमांतर्गत पोलिस अधीक्षक कार्यालयापासून चांदबिबी महालाच्या दिशेने ट्रेकिंग मोहीम मार्गस्थ होणार आहे. यात महिला, पुरुष व लहान मुलांनाही विनामूल्य प्रवेश आहे. स्वतःच्या वाहनाने हे सर्वजण चांदबिबी महालाच्या पायथ्याशी गेल्यावर महालाच्या डोंगरावर ट्रेकिंग करणार आहेत. बुलेट रॅली व ट्रेकिंग मोहिमेतील सर्वजण महालावर एकत्र झाल्यानंतर विविध सांस्कृतिक व क्रीडा स्पर्धांचे कार्यक्रम होणार आहेत. जागतिक महिलादिनी महिलांविषयक अनेकविध उपक्रम जगभरात होतात, पण समाजव्यवस्थेतील महत्त्वाचा भाग असलेल्या पुरुषांविषयी मात्र फारसे स्वतंत्र कार्यक्रम होत नसल्याने या स्पर्धात्मक उपक्रमांचे आयोजन करण्यात आले आहे. संपर्क : ९४२२२२७५८७.
................