म. टा. प्रतिनिधी, नगर एल अँड टी कंपनीतील अधिकारी, कर्मचारी व कामगारांच्या गुणवंत पाल्यांचे कौतुक नुकतेच कंपनीत केले गेले. दहावी-बारावीमध्ये उत्तुंग यश मिळविल्यानंतर फक्त डॉक्टर-इंजिनिअरच न होता, प्रशासकीय अधिकारी, शिक्षक-प्राध्यापक व समाजसेवा क्षेत्राचाही पर्याय करियर करताना समोर ठेवण्याचा सल्ला येथील एल अँड टी कंपनीने विद्यार्थ्यांना दिला. या विचाराची सुरूवात म्हणून झाडाचे छानसे रोप देऊन त्याचे संगोपन करण्यासही प्रोत्साहन दिले. झेडपीचे सीईओ रवींद्र बिनवडे, एल अँड टीचे सहसरव्यवस्थापक अरविंद पारगावकर, मानव संसाधन विभाग प्रमुख नागेशचंद्र आढाव, कामगार सेनेचे अध्यक्ष किरण देशमुख आदींच्या उपस्थितीत या गुणवंतांचा गौरव करण्यात आला. शिक्षण ही अविरत प्रक्रिया असून, जिद्द, चिकाटी व चिकित्सापूर्वक अभ्यासानेच जीवनात यशस्वीता मिळवता येते, असे बिनवडे यांनी यावेळी सांगितले. पारगावकर यांनी विविध करियर क्षेत्रांची माहिती दिली. ईश्वर हांडे, शेफाली भट्टाचार्य, रवींद्र भावसार, धनंजय कुलकर्णी आदींनी उपक्रमासाठी परिश्रम घेतले.
रोप देऊन गुणवंतांचा गौरव
एल अँड टी कंपनीतील अधिकारी, कर्मचारी व कामगारांच्या गुणवंत पाल्यांचे कौतुक नुकतेच कंपनीत केले गेले.
Maharashtra Times 30 Jul 2016, 3:00 am