दूध ‘बंद’वर संघटना ठाम

म. टा. प्रतिनिधी, नगर

'दूध दरासंबंधी तोडगा काढण्यासाठी सरकारसोबत झालेल्या पहिल्या बैठकीनंतर सरकारकडून काहीच प्रतिसाद मिळालेला नाही. त्यामुळे एक ऑगस्टपासून राज्यात 'दूध बंद' आंदोलन करण्यावर शेतकरी संघटना ठाम आहेत. विविध संघटनांच्या ऑनलाइन संयुक्त बैठकीत हा निर्णय घेण्यात आला आहे,' अशी माहिती सूकाणू समितीचे सदस्य अनिल देठे पाटील यांनी दिली.

दुधाच्या दरात वाढ करण्याच्या मागणीसाठी दूध उत्पादकांनी एक ऑगस्टपासून दूधपुरवठा बंद करण्याचा इशारा दिला आहे. याची दखल घेऊन दुग्धविकासमंत्र्यांनी मंत्रालयात शेतकरी प्रतिनिधींची बैठक घेतली. यासंबंधी सरकार योजना आणत असून, लवकरच ती जाहीर केली जाईल, असे आश्वासन त्यांनी दिले होते. मात्र, बैठक होऊन पाच दिवसांनंतरही पुढे काहीच हालचाल झाली नाही. त्यामुळे आंदोलनात सहभागी असलेल्या विविध संघटनांच्या पदाधिकाऱ्यांची ऑनलाइन बैठक झाली. सरकारकडून काहीच हालचाल न झाल्याने एक ऑगस्टपासून दूध बंद आंदोलन सुरू करण्याचा निर्णय यामध्ये घेण्यात आला.

या बैठकीत माजी राज्यमंत्री सदाभाऊ खोत, किसान सभेचे नेते डॉ. अजित नवले, शेतकरी नेते तथा राज्य सुकाणू समिती सदस्य अनिल देठे पाटील, रोहिदास धुमाळ, धनंजय धोर्डे, महेश नवले, सुरेश नवले, डॉ. संदीप कडलग, उमेश देशमुख सहभागी झाले होते. एक ऑगस्टपासून आंदोलन करण्यावर ठाम राहण्याचा निर्णय या बैठकीत घेण्यात आल्याचे देठे पाटील यांनी सांगितले.

असे असेल आंदोलन

बैठकीत आंदोलनाचे स्वरूपही ठरविण्यात आले. एक ऑगस्टपासून राज्यातील दूध उत्पादक शेतकरी आपल्याकडील दूध कोणत्याही दूध संस्थेला, दूध संघांना देणार नाहीत. त्या दुधातून आपापल्या गावातील चावडीवर सामुहिकपणे दुग्धाभिषेक आंदोलन केले जाईल. हे आंदोलन स्वयंशिस्त व सुरक्षित अंतराचे नियम पाळून केले जाईल. उरलेले दूध समाजातील गरजू लोकांना मोफत वाटण्यात येईल. त्यानंतर दोन ऑगस्टला पुन्हा संघटनांच्या प्रतिनिधींची बैठक होऊन आंदोलनाची पुढील दिशा ठरविण्यात येईल.