मेन
--
सावेडीत दवाखाना, जलतरण तलाव
मनपा स्थायीचे अंदाजपत्रक महासभेत; आजपासून चर्चा
म. टा. प्रतिनिधी, नगर
सावेडीमध्ये महापालिकेच्या अत्याधुनिक दवाखान्यासह महिला व पुरुषांसाठी जलतरण तलाव बांधण्याचा संकल्प स्थायी समितीने यंदा केला आहे. तशी शिफारस मनपाच्या यंदाच्या अंदाजपत्रकात समितीने केली आहे. महासभेत सादर झालेल्या या अंदाजपत्रकावर गुरुवारपासून (२९ मार्च) चर्चा सुरू होणार आहे. या चर्चेनंतर तसेच नगरसेवकांनी सुचवलेल्या शिफारशींचा अंतर्भाव करून हे अंदाजपत्रक अंतिम स्वरुपात मनपा प्रशासनाला दिले जाणार आहे. त्यानंतर त्याची अंमलबजावणी होणार आहे.
मनपा प्रशासनाने तय़ार केलेल्या यंदाच्या अंदाजपत्रकावर स्थायी समितीने चर्चा करून तब्बल ७२ नव्या शिफारशी केल्या आहेत. या शिफारशींसह नवे विकास प्रकल्प मांडणारे हे अंदाजपत्रक स्थायी समितीच्या सभापती सुवर्णा जाधव यांनी बुधवारी महासभेत महापौर सुरेखा कदम यांना दिले. या वेळी उपमहापौर अनिल बोरुडे, आयुक्त घनश्याम मंगळे, महिला व बालकल्याण समितीच्या सभापती सारिका भुतकर, स्थायी समिती सदस्य बाबासाहेब वाकळे, दत्ता कावरे, अनिता राठोड तसेच उषा ठाणगे व अन्य उपस्थित होते.
बारा कोटींची वाढ
मनपा प्रशासनाने यंदा ६१९ कोटींचे अंदाजपत्रक स्थायी समितीला सादर केले होते. या समितीने यातील विविध उत्पन्न तरतुदींमध्ये वाढ सुचवताना काही खर्च तरतुदींमध्ये कपात केली तसेच नव्याने काही विकास प्रकल्पांसाठी आर्थिक तरतूद करून हे अंदाजपत्रक ६३१ कोटी ३८ लाखाचे केले आहे. १२ कोटी ३८ लाखांची वाढ स्थायी समितीने केली आहे. मनपा अपेक्षित उत्पन्नाच्या २० लेखाशीर्षांमध्ये कमी-जास्त प्रमाणात मिळून १२ कोटी ४० लाखांची वाढ केली गेली आहे. तर खर्चाच्या ५८ लेखाशीर्षांपैकी २९ लेखाशीर्षांमध्ये १६ कोटी ४९ लाखांची वाढ व राहिलेल्या २९ लेखाशीर्षांमध्ये ४ कोटी ८ लाखाची घट केली आहे.
सांस्कृतिक वाटपावर नाराजी
सामाजिक संस्थांना देणगी या लेखाशीर्षाखाली सध्या दिल्या जात असलेल्या दीड लाखाच्या अनुदानात ५० हजाराने वाढ करण्याच्या स्थायीच्या निर्णयावर सदस्यांमधून नाराजी व्यक्त झाली. महासभेत अंदाजपत्रक चर्चेच्या वेळी या सांस्कृतिक वाटपाला आक्षेप घेतला जाण्याची चिन्हे आहेत, असे अनुदान दिल्या जाणाऱ्या बहुतांश संस्था प्रायोजकांद्वारे पैसे जमवून कार्यक्रम करीत असताना नव्याने महापालिकेकडून त्यांना देणे चुकीचे असल्याचे काहींचे म्हणणे आहे. अनेक छोट्या संस्थांना प्रायोजकांअभावी कार्यक्रम करता येत नसल्याने अशा संस्थांना ही मदत दिली जावी, असेही सांगितले जात आहे. त्यामुळे हा विषय गाजण्याची चिन्हे आहेत. सध्या असे दीड लाखाचे अनुदान वाटप रसिक ग्रुपचा गुढीपाडवा उत्सव, नगर जल्लोष ट्रस्ट नगर शहर स्थापना दिन साजरा करणे, रायगड तरुण मंडळ ट्रस्ट व नंदनवन मित्रमंडळ ट्रस्ट यांच्यासह अन्य काही संस्थांना दिले जात आहे.
कोरमअभावी राष्ट्रगीत उशिरा
मनपाची महासभा सुरू झाल्यानंतर अवघे २२ नगरसेवक उपस्थित होते. ७३ सदस्यांच्या या सभागृहात कोरमसाठी एकतृतीयांश म्हणजे २४ नगरसेवक आवश्यक असतात. १५ मिनिटांनी दोन सदस्य आल्यावर कोरम पूर्ण झाला व त्यानंतर राष्ट्रगीत होऊन सभा सुरू झाली. मात्र, दोन सदस्यांची वाट पाहण्याच्या काळात उपस्थित सदस्यांची आपसात एकमेकांची राजकीय खेचाखेची रंगली होती.
---
स्थायीचे नवे विकास संकल्प
-सावेडी जलतरण तलावासाठी दीड कोटी
-सावेडीमध्ये मनपा रुग्णालयासाठी १ कोटी
-सावेडीत अद्ययावत भाजी मार्केटसाठी १ कोटी
- काटवन खंडोबा ते खोकर नालापर्यंत मॉडेल रस्ता व त्यासाठी दीड कोटी.
-सक्कर चौकातील डॉ. बाबासाहेब आंबेडकर स्मारकात अद्ययावत जीमसाठी ५० लाख
-छत्रपती शाहू महाराज पुतळ्यासाठी नवे लेखाशीर्ष निर्मिती व २० लाखाची तरतूद. तसेच छत्रपती शिवाजी महाराज, छत्रपती संभाजी महाराज व पुण्यश्लोक अहल्यादेवी होळकर पुतळ्यांसाठीही प्रत्येकी २० लाखाची तरतूद.
-मनपा शाळांमध्ये ई-लर्निंग सुविधेसाठी १० लाख
-मनपा शाळांच्या गणित-विज्ञान प्रदर्शनासाठी ५० हजार
---